Fransanın “Le Figaro” qəzeti Ermənistan parlamentində Avropa Birliyinə üzvlüklə bağlı danışıqların başlanmasına dair qanun layihəsinin birinci oxunuşda qəbul edilməsini şərh edib.

Axar.az xəbər verir ki, nəşr bunu İrəvanın Qərblə münasibətləri gücləndirmək istəyi kimi qiymətləndirərək, Ermənistanın hazırda ənənəvi müttəfiqi Rusiya ilə münaqişəsinin olduğunu qeyd edib.

“Avroreferendum” üçün imzatoplama prosesini təqdim edən qəzet qeyd edib ki, ötən il AB-yə üzvlük lehinə aparılan imzatoplama kampaniyası zamanı 2,7 milyon əhalisi olan Ermənistanda 60 minə yaxın imza toplanıb.

Yazıda İrəvanla Moskva arasında münasibətlərdə yaranan məsələlərə, nəşrin “itaətsizlik addımları” adlandırdığı Ermənistanın Rusiyaya qarşı demarşlarına və onların səbəblərinə də toxunulub.

Qeyd edək ki, erməni mediası Fransa mediasının “Ermənistanın 2,7 milyon əhalisi var” ifadəsinə vurğu edib. Çünki bu rəqəm Ermənistanın Statistika Komitəsinin açıqladığından azdır və erməni ekspertlərin fikrincə, reallığa daha yaxındır.