Türkiyə Cümhurbaşqanı Rəcəb Tayyib Ərdoğan hökumət toplantısından sonra verdiyi açıqlamalarda müxtəlif mövzularla yanaşı martın 5-də Azərbaycan Prezidenti İlham Əliyevlə görüşü və İğdır-Naxçıvan qaz kəmərinin əhəmiyyəti barədə fikirlərini bildirdi. Layihə sayəsində Naxçıvanın təbii qaza olan tələbatının ən azı 30 il ərzində təmin olunacağını vurğulayan Ərdoğanın sonrakı cümləsinə də diqqət yetirmək lazım gəlir: “İlham Əliyevlə Ermənistanla sülh danışıqları və digər mühüm məsələləri müzakirə etdik”.

Axar.az xəbər verir ki, bu sözləri politoloq Elxan Şahinoğlu qeyd edib.

“Azərbaycan və Türkiyə prezidentlərinin imzaladıqları Şuşa Bəyannaməsinə görə, iki ölkə xarici və təhlükəsizlik siyasətini koordinasiya etməlidir. Bu baxımdan Rəcəb Tayyib Ərdoğanın “mühüm məsələlər” dediyi mövzular ABŞ Prezidenti Donald Trampın Rusiya ilə yaxınlaşma istəyinin Cənubi Qafqaza mümkün təsirlərindən tutmuş Rusiyanın regional siyasətinə qədər təfərrüatı əhatə edə bilər”, - politoloq bildirib.