“Təhsil müəssisələrinin akkreditasiyası Qaydaları”nda dəyişiklik edilib.

Axar.az xəbər verir ki, bununla bağlı Baş nazir Əli Əsədov qərar imzalayıb.

Qərar əsasən təhsil müəssisələrinin fəaliyyətinin və təhsil proqramlarının icrasının hər təhsil pilləsi üzrə dövlət təhsil standartlarının tələblərinə uyğunluğu müvafiq Akkreditasiya Meyarlarına əsasən qiymətləndirilir.

Akkreditasiya Meyarları üçün maksimum bal ölçüsü hər bir meyar üzrə indikatorların sayından və hər bir indikator üzrə müəyyən edilən maksimum baldan asılı olaraq hesablanır.

Təhsil müəssisəsi və ya təhsil proqramı üçün maksimum bal ölçüsü Akkreditasiya Meyarları üzrə hesablanmış maksimum balların toplanmasından ibarətdir. Təhsil müəssisəsi və ya təhsil proqramı üçün müəyyən olunmuş maksimum bal ölçüsünün akkreditasiya zamanı toplanılan bal üzrə qiymətləndirilməsi aşağıdakı qaydadakı kimi müəyyənləşdiriləcək:

maksimum balın 85-100 faizi - “uyğundur”;

maksimum balın 70-84 faizi - “əsasən uyğundur”;

maksimum balın 55-69 faizi - “qismən uyğundur”;

maksimum balın 54 və daha aşağı faizi - “uyğun deyil”.