Sankt-Peterburqun cənubunda yerləşən “Aqropark Nart” topdansatış-paylayıcı mərkəzi genişləndirilir. Layihə çərçivəsində 5 minə yaxın azərbaycanlı işlə təmin olunub.

Axar.az xəbər verir ki, Sofiyskaya küçəsi 151 ünvanında yerləşən aqroparkın ərazisində növbəti 5–7 il ərzində təxminən 300 min kvadratmetr yeni anbar sahəsi tikiləcək. Bu barədə “Aqropark Nart” Topdansatış-Paylayıcı Mərkəzi” MMC-nin icraçı direktoru Andrey Butyuqin “DP” nəşrinə açıqlamasında bildirib.

Onun sözlərinə görə, ötən il aqroparka bitişik torpaq sahələrinin alınmasından sonra layihənin ümumi ərazisi 93 hektara çatıb. Genişlənmə planına biznes mərkəzi və ticarət mərkəzinin inşası da daxildir.

Layihə üzrə hər il 30–50 min kvadratmetr sahənin istifadəyə verilməsi nəzərdə tutulur. Ümumi investisiya həcmi 22–23 milyard rubl (təxminən 470–492 milyon manat) təşkil edəcək. Tikinti işləri şirkətin öz vəsaitləri hesabına aparılacaq.

Genişlənmədən sonra aqroparkın illik məhsul dövriyyəsinin 3,5 milyon tona çatacağı gözlənilir. 2026-cı il üçün 50 min kvadratmetr sahənin istismara verilməsi planlaşdırılıb. Obyektlərin bir qismi üzrə artıq tikintiyə icazə alınıb, digər hissələrdə isə layihələndirmə və hazırlıq işləri davam edir.

Yeni anbarlar multitemperatur rejimli olacaq. Bu isə eyni məkanda müxtəlif növ kənd təsərrüfatı məhsullarının saxlanmasına imkan verəcək.

Tikintisi planlaşdırılan biznes mərkəzi aqroparkla əməkdaşlıq edən təchizatçılar, logistika şirkətləri və distribyutorlar üçün nəzərdə tutulub. Mərkəzdə ofislərlə yanaşı, konfrans zalları, kovorkinq məkanları və iaşə obyektləri fəaliyyət göstərəcək.

Ticarət mərkəzi isə kənd təsərrüfatı məhsullarının pərakəndə satışına yönələcək. Burada istehsalçıların məhsullarını nümayiş etdirə biləcəyi zallar, ictimai iaşə obyektləri və alıcılar üçün servis zonaları yaradılacaq. Mərkəz regional istehsalçıların məhsullarının tanıdılmasına xidmət edəcək.

Andrey Butyuqin bildirib ki, genişlənmə aqroparkın fəaliyyət imkanlarını əhəmiyyətli dərəcədə artıracaq. Hazırda mövcud infrastruktur tərəvəz və meyvələrin emalını əhatə edir. Yeni güclər isə şirə istehsalı, dondurulmuş məhsullar və digər kənd təsərrüfatı məhsullarının emalına yönəldiləcək. Eyni zamanda pərakəndə ticarət sahələrinin yaradılması da planlaşdırılır.

Layihənin əsas məqsədi Peterburqda kənd təsərrüfatı məhsullarının böyük hissəsini vahid məkanda cəmləşdirməkdir. Topdansatış-paylayıcı mərkəz formatı logistika xərclərinin azaldılmasına və məhsul dövriyyəsinin sürətlənməsinə imkan verəcək. Butyuqinin sözlərinə görə, bu layihə “tarladan piştaxtaya qədər” prinsipi əsasında qurulan çoxfunksiyalı aqrar klaster olacaq.

Aqroparkın inkişafı “Aqropark Nart” MMC-nin sahibləri Ruslan Misikov və Elbrus Məmmədov tərəfindən həyata keçirilir. Layihə 2019-cu ildə başlayıb. 42 min kvadratmetrlik birinci mərhələ 2022-ci ilin mayında istifadəyə verilib. 2024-cü ilə qədər obyektlərin ümumi sahəsi 110 min kvadratmetrə çatdırılıb.

Hazırda aqroparkın ərazisində uzunmüddətli saxlama üçün anbarlar, istehsal və anbar kompleksləri, topdansatış-paylayıcı mərkəz, 300 avtomobil üçün fermer ticarət meydançası, biznes mərkəzi və müxtəlif infrastruktur obyektləri fəaliyyət göstərir.

Daşınmaz əmlak üzrə ekspert Aleksandr Şevelyov bildirib ki, layihənin genişləndirilməsi aqroparkın mövcud sahələrinin artıq yüksək doluluq səviyyəsinə çatması ilə bağlıdır. Onun sözlərinə görə, obyektin əlverişli yerləşməsi məhsulların tədarükünü təkcə Peterburq və Leninqrad vilayəti ilə deyil, Moskva istiqamətində də effektiv şəkildə təşkil etməyə imkan verir. Ekspert əlavə edib ki, Peterburqda yeni multitemperatur anbar kompleksləri az tikilir və mövcud boş sahələrin əksəriyyəti şəhərdən kənarda yerləşir.