Fövqəladə Hallar Nazirliyinin idmançıları 2026-cı ilin sentyabr ayında keçirilmiş idmanın müxtəlif növləri üzrə dünya çempionatlarında yüksək nəticələr əldə ediblər.

Axar.az xəbər verir ki, belə ki, sentyabrın 18-dən 27-dək İtaliyanın Jesolo şəhərində Dünya Kikboksinq Federasiyasının təşkilatçılığı ilə Gənclər və yeniyetmələr arasında kikboksinq üzrə dünya çempionatı keçirilib. “Low kick”, “kick light”, “K1” və “full contact” kateqoriyaları üzrə keçirilən yarışda dünyanın 79 ölkəsindən 5130-a yaxın idmançı iştirak edib.

Çempionatda Azərbaycan Kikboksinq Federasiyasının gənclərdən ibarət komandasının və FHN-in İdman-sağlamlıq klubunun kikboksinq üzrə yığma komandasının üzvü Əli Nəcəfov da iştirak edib. Klubun məşqçi-müəllimi Elşən İsayevin rəhbərliyi ilə mübarizə aparan idmançımız gənclər arasında +91kq çəki dərəcəsində “low kick” kateqoriyasında ikinci yeri tutub. Əli Nəcəfova çempionatın gümüş medalı və diplomu təqdim olunub.

Sentyabrın 24-dən 27-dək isə Yaponiyanın Tsuchiura şəhərində Beynəlxalq Qol Güləşi Federasiyasının təşkilatçılığı ilə Qol güləşi üzrə dünya çempionatı keçirilib. Dünyanın 30 ölkəsindən 1017 idmançının iştirak etdiyi yarışda Azərbaycan Bodibildinq və Fitnes Federasiyasının yığma komandasının üzvü, FHN-in Dövlət Yanğından Mühafizə Xidmətinin əməkdaşı Toğrul Şahlarlı da mübarizə aparıb. 78 kq çəki dərəcəsində sağ qol üzrə keçirilən yarışda altı görüşün hamısında qalib gələn Toğrul Şahlarlı dünya çempionu adını qazanıb. İdmançıya Beynəlxalq Qol Güləşi Federasiyasının təsis etdiyi qızıl medal və sertifikat təqdim edilib.

Oktyabrın 6-da FHN-in İdman-sağlamlıq klubunun rəisi polkovnik Füzuli Musayev uğur qazanmış idmançılarla görüşərək onları təbrik edib, gələcək yarışlarda uğurlar arzulayıb. Görüşdə qazanılmış nailiyyətlərin əhəmiyyətindən danışılıb, medalçılara qiymətli hədiyyələr təqdim olunub.