İranın Gülüstan əyalətinin mərkəzi sayılan Qorqan şəhərində polis və təhlükəsizlik qüvvələrinin bağ evlərinin birində keçirilən gecə kampaniyasına birgə hücumunda daha 60 qız və oğlan tutulub.

Axar.az xəbər verir ki, bu barədə Qorqan İnqilab Məhkəmələrinin sədri İzzətullah Həmzə Nejad jurnalistlərə açıqlamasında məlumat verib.

Həmzə Nejad bildirib ki, Qorqanın əxlaq təhlükəsizliyi polisi şəhərin Tuskistan məntəqəsindəki bağ evlərinin birində gənc qız və oğlanların qanunsuz olaraq bir araya gəlməsi barədə xəbər tutduqdan sonra həmin evdə əməliyyat keçiriblər:

“Villada yoxlama apararkən çoxlu alkoqullu içkilər aşkarlanıb. Sərxoş vəziyyətdə birlikdə əylənib-şənlənən 60 qız və oğlan isə tutularaq polis bölməsinə aparılıb. Həmçinin bağ evinin sahibi və qonaqlığı təşkil edən şəxslər məsuliyyətə cəlb edilərək barələrində cinayət işi açılıb”.

İzzətullah Həmzə Nejad hadisənin konkret nə vaxt baş verdiyini mediaya açıqlamayıb.

Xatırladaq ki, 2016-cı ilin iyun ayından bu günə kimi İranın müxtəlif şəhərlərində qız və oğlanların birgə qatıldığı gecə qonaqlıqlarına və ad günləri mərasimlərinə edilən hücumlarda 1160-dən çox adam həbs edilib.