13:54

Culfa rayonunun sərhəddə yerləşən Ləkətağ kəndinin sakinləri kəndi boşaltmaq məcburiyyətində qalıb. Bunu simsar.az Naxçıvan MR Culfa rayon sakinlərinə istinadən yayıb.

Məlumatda bildirilir ki, ermənilər Culfa rayonunun Ləkətağ kəndini yüksək çaplı silahlardan atəşə tutubar. Dinc sakinlər kəndi tərk etmək məcburiyyətində qalıblar. Hətta digər məlumatda bildirilir ki, ərazidəki Kola adlı yüksəkliyi ermənilər nəzarətə götürüblər.

Kənd sakinləri onu da bildiriblər ki, ermənilər Naxçıvanda cəbhəboyu hərəkətə keçiblər. Hazırda qızğın döyüşlər gedir.

Məlumatı dəqiqləşdirmək üçün Müdafiə Nazirliyi ilə əlaqə saxlamağa çalışırıq.

14:18

Hadisə ilə bağlı Axar.az-a danışan Naxçıvanda olan həmkarımız Həkimeldostu Mehdiyev bildirdi ki, Naxçıvanda, Ləkətağ istiqamətində ermənilərin atəşkəsi pozması halları son günlər intensivləşib:

"Hazırda da fasilələrlə atışmalar davam edir. Amma dünən və srağagün ermənilər daha intensiv atırdılar. Adətən, iri çaplı silahlardan istifadə edilir".

H.Mehdiyevin sözlərinə görə, Ləkətağ kəndinin sakinlərinin kəndi boşaltması və ermənilərin Kola yüksəkliyini ələ keçirməsi barədə məlumatlar əsassızdır:

"Ləkətağ kəndinin sakinləri heç hara köçməyiblər, adi gündəlik həyatlarını yaşayırlar. Doğrudur, təmas xəttinə çox yaxındırlar. Ancaq ermənilər atəşkəsi pozanda əsgərlərimiz qarşılıq verir və sakinlər üçün heç bir narahatlıq yoxdur".

***

16:01

Müdafiə Nazirliyi ermənilərin Naxçıvan istiqamətində fəallaşmasına münasibət bildirib. Nazirliyin Mətbuat Xidmətindən Axar.az-a verilən məlumatda qeyd edilir ki, yayılan xəbərlərin heç bir əsası yoxdur:

"Müdafiə Nazirliyi rəsmi olaraq bildirir ki, yayılan məlumatların heç bir əsası yoxdur və yalandır. Hazırda bu istiqamətdə vəziyyət sabitdir və əməliyyat şəraiti ordumuzun tam nəzarəti altındadır".

Bu arada sosial şəbəkələrdə Ləkətağ istiqamətinə Azərbaycan Ordusunun ağır texnika yeritdiyi barədə məlumat yayılıb. Bildirilir ki, hazırda da atışma davam edir.

18:21

Sədərək rayonunda yaşayan sakinlərin bir neçə dəqiqə əvvəl virtualaz.org saytına verdiyi məlumata görə, hazırda ərazidə atışma səsləri eşidilir.

"Sədərəyin sərhədə yaxın olan kəndlərin bəzilərində evlər boşaldılıb. Bundan əvvəl də bölgədə atışma olurdu. Amma indiki kimi yox. Hazırda hamı narahatlıq içindədir" - deyə Sədərək sakinləri bildirir.

Naxçıvandan olduğu bildirilən Elməddin Səmədzadə adlı istifadəçi sosial şəbəkədə atışma ilə bağlı xəbər paylaşıb:

"Kim deyirsə ki, Naxçıvanda heç nə olmayıb, inanmayın. Müharibə gedir, qırğındı orda. Müdafiə Nazirliyi də panika yaranmasın deyə, xəbəri yalanlayır. Amma ciddi-ciddi ermənilər hücuma keçib".

Axar.az-a daxil olan daha bir qeyri-rəsmi məlumatda isə bildirilir ki, ermənilərin Ləkətağ yaxınlığında otlaq sahəsi kimi istifadə olunan neytral ərazidə post qurmasına cavab olaraq Azərbaycan Silahlı Qüvvələri konkret vaxt qoyub. Qısa müddətdə həmin postun götürülməsi və ermənilərin əvvəlki mövqelərinə çəkilməsi tələb edilir. Götürülməyəcəyi təqdirdə Azərbaycan ordusu ağır texnika ilə postu göyə sovuracağını bəyan edib.

Ləkətağ istiqamətində ağır artilleriya yeridilməsi və hərbi təyyarələrin dövrə vurmasının da səbəbinin bu olduğu bildirilir.