"Reallıq budur ki, hazırda dünyanın digər inkişaf etmiş regionları ilə müqayisədə İslam Əməkdaşlıq Təşkilatı regionunda ümumi və ayrı-ayrı əhali qrupları üzrə məşğulluq səviyyəsi aşağı olaraq qalır. 2012-ci ildə dünya üzrə gənclərin işsizlik səviyyəsi 12,6 faiz olduğu halda, İƏT ölkələri üzrə orta göstərici 15,6 faiz olub".

"Axar.az" xəbər verir ki, bu fikirləri Bakıda İƏT-in Əmək, məşğulluq və sosial müdafiə ilə bağlı Çərçivə sənədinin icrası üzrə Rəhbər Komitəsinin ilk iclasında nazir Səlim Müslümov bildirib. Əlavə edib ki, son 10 ildə ölkəmizdə 1 milyon 200 mindən çox yeni iş yeri yaradılıb, işsizliyin səviyyəsi 5 faizə, yoxsulluq səviyyəsi isə 45 faizdən 5,3 faizə enib, əhalinin gəlirləri 6,5 dəfə çoxalıb:

"Qazanılan iqtisadi uğurlara nüfuzlu beynəlxalq institutlar və reytinq təşkilatları tərəfindən də yüksək qiymət verilir. Bunun daha bir ifadəsi kimi, 2013-cü ildə "Qlobal Rəqabətlilik Hesabatı"na əsasən, Azərbaycan MDB ölkələri arasında 1-ci yerdə olmuş və bu hesabatda ölkəmiz 7 pillə irəliləyərək 148 ölkə arasında 39-cu yerə yüksəlib".

Nazir İƏT-in Bakıda Əmək Mərkəzinin yaradılması ilə bağlı görülən işlərdən də danışıb. Bildirib ki, Əmək Mərkəzinin Konsepsiya Sənədi və Mərkəzin Nizamnaməsinin layihəsi artıq hazırlanıb və baxılması üçün üzv dövlətlərə təqdim edilib:

"Hesab edirik ki, belə bir Mərkəzin yaradılması üzv dövlətlər arasında əmək, məşğulluq və sosial müdafiə məsələlərinin inkişafı sahəsində regional əməkdaşlığı gücləndirəcək, eləcə də üzv dövlətlər arasında qabaqcıl innovativ və sosial inteqrasiya təcrübələri və beynəlxalq standartların mübadiləsini sürətləndirəcək".

Qeyd edək ki, iclasda əmək, məşğulluq və sosial müdafiə sahələrində əməkdaşlığı nəzərdə tutan Çərçivə sənədinin icrası məqsədilə hazırlanmış Fəaliyyət Planı müzakirə edilib.