Mətbuat Şurasının rəsmi internet səhifəsi "donub".

Axar.az xəbər verir ki, bir başa mətbuata bağlı olan qurumun rəsmi internet saytı elektron medianın sürətlə inkişaf etdiyi dövrdə, demək olar ki, fəaliyyətsizdir.

Şuranın saytında mətbuatla bağlı ümumiyyətlə hər hansı məlumat əldə etmək mümkün deyil.

Mətbuat Günü ilə bağlı sadəcə bir yazı yerləşdirilən saytda bayram törənlərinin də yer almaması diqqət çəkir. Xüsusilə bəzi rəsmi saytların artıq öz materiallarını operativ yerləşdirməsini və medianın istinadına çevrilməsini nəzərə aldıqda, bir media qurumunun internet resursunun çevik olmaması o qədər də anlaşılan görünmür.

Saytın gec-gec yenilənmə səbəbindən danışan MŞ-nın icraçı katibi Rəhim Hüseynzadə Axar.az-a bildirdi ki, burda ancaq Şuranın keçirdiyi tədbirlər yerləşdirilir:

"Bu o demək deyil ki, saytımız yenilənmir. Biz keçirilən bütün tədbirlərin mətnini sayta yerləşdiririk. Press-relizlər və fotolar daim əlavə edilir. Mətbuat Şurasının saytı bu şəkildə fəaliyyət göstərir".

İcra katibi saytın rəsmi olaraq belə də fəaliyyətini davam etdirəcəyini və hər hansı yeniliyin nəzərdə tutulmadığını bildirdi.