Prezident İlham Əliyevin imzaladığı sərəncamla Ağdam Rayon İcra Hakimiyyətinin başçısı təyin edilən Vaqif Həsənovun tərcümeyi-halı bəlli olub.

Axar.az xəbər verir ki, Vaqif Bəhram oğlu Həsənov 1959-cu ildə Ağdam şəhərində doğulub. 1986-cı ildə Azərbaycan Dövlət Universitetinin tarix fakültəsini bitirib.

1977-ci ildə Bərdə kolxozlararası tikinti idarəsində fəhlə işləyib. 1977-79-cu illərdə hərbi xidmət keçib, 1980-cı ildən 1987-ci ilə qədər “26 Bakı komissarı” adına NQÇİ-də elektrik çilingəri kimi çalışıb.

1987-1989-cu illərdə “26 Bakı komissarı” adına NQÇİ-nin Mənzil Kommunal Təsərrüfatının partiya təşkilatında katib, 1991-ci ilə qədər Bakı Sosial İdarəetmə və Politologiya İnstitutunda dinləyici kimi çalışıb.

Daha sonra “26 Bakı komissarı” adına NQÇİ-nin partiya komitəsində katib, Ə.Ç.Əmirov adına NQÇİ-nin Xüsusi şöbə rəisi, H.Z.Tağıyev adına NQÇİ-nin Mənzil Kommunal Təsərrüfatı rəisi, H.Z.Tağıyev adına NQÇİ-nin Kadrlar şöbəsində rəis, Nərimanov adına NQÇİ rəisinin ümumi məsələlər üzrə müavini olub.

2006-cı ildən 2011-ci ilə qədər Bakı şəhəri Qaradağ Rayon İcra hakimiyyəti başçısının müavini, 2013-cü ilə qədər Xəzər Rayon İcra Hakimiyyəti başçısının müavini, 2013-cü ildən 2018-ci ilə qədər isə birinci müavini vəzifələrində çalışıb.