Uzun müddətdir təmirə bağlanan Ziya Bünyadov prospektində təmir işlərinin əsaslı hissəsi başa çatsa da, hələ də tam istifadəyə verilməyib.

Axar.az əməkdaşı xəbər verir ki, yol qovşaqları bir neçə gün sürücülərin ixtiyarına verildi, ancaq ötən gündən başlayaraq, yenə də biri istisna olmaqla, digərləri bağlanıb.

"Azəryolservis" ASC-dən bildiriblər ki, prospektin qovşaqlar da daxil olmaqla ümumi uzunluğu 9,2 kilometr, hərəkət zolaqlarının sayı isə 10-12 zolaq arasında dəyişir. Artıq yol boyu nəzərdə tutulan qovşaqlardan biri tam istismara verilib, digər 3 qovşaqda isə işlər başa çatdırılsa da, hələlik bağlıdır. Bəzi köməkçi hissələr istisna olmaqla, üç qat asfalt-beton örtüyünün döşənməsi sona çatmaq üzrədir. İşıqlandırma sisteminin də böyük hissəsi quraşdırılıb, drenaj sistemində isə işlərin 95 faizi görülüb.

Xatırladaq ki, bir müddət öncə Dərnəgül yolu kimi tanınan Ziya Bünyadov prospektinin oktyabr ayında təhvil veriləcəyi rəsmən elan edilmişdi. Hazırda işlərin əhəmiyyətli hissəsi görüldüyü üçün yolun qısa müddətdə paytaxt sakinlərinin ixtiyarına veriləcəyi gözlənilir. Ancaq ASC-dən oktyabr ayı təsdiqlənsə də, konkret tarixi açıqlamayıblar.