Əməkhaqqının rəsmi əmək müqaviləsində göstərilməməsi həmin şəxslərin pensiya hüququndan məhrum edilməsi deməkdir. Bu qanun layihəsinin qəbul edilməsi yüzminlərlə insanın pensiya hüququnun bərpasına imkan yaradacaq.

Axar.az xəbər verir ki, bu sözləri Vergilər naziri Mikayıl Cabbarov Milli Məclisdə Vergi Məcəlləsinə dəyişiklik barədə çıxış edərkən deyib.

Nazir bildirib ki, statistikaya görə, 2014-2016- illər ərzində müqaviləsiz işləyənlərin sayı artıb.

“Bu ilin 10 ayı ərzində 4100 pozuntu aşkar edilib və cinayət işi açılıb. Bu tədbirlər sahibkarda motivasiya yaratmadığından istənilən effekti vermir. Bu qanun layihəsinin qəbulu əhalinin bank kreditlərinə çıxış imkanını genişləndirəcək. Qanunun qəbulu özəl sektorda 500 mindən çox insanın əməkhaqqının artırılması anlamına gəlməməlidir, sadəcə mövcud əməkhaqqının qanuniləşdirilməsidir”, - nazir qeyd edib.