10:07

Bakının tarixi məkanlarından hesab edilən və tarixi irs kimi qorunan Qoşa Qala qapısının yaxınlığında qala divarlarına bitişik obyekt inşa edilir.

Axar.az xəbər evrir ki, bu barədə məlumatı “Təmiz Bakı” səhifəsi paylaşıb.

Fotodan aydın görünür ki, yeni inşa edilən obyekt qala divarlarına bitişik formada tikilir. Tikintinin kimlər tərəfindən aparıldığı məlum deyil. İşlər yaxın günlərdə başlayıb və olduqca sürətlə aparılır.

İçərişəhər Dövlət Tarix-Memarlıq Qoruğu İdarəsinə məsələ ilə bağlı sorğu göndərilib.

***

“İçərişəhər” Dövlət Tarix-Memarlıq Qoruğu İdarəsi (DTMQİ) Kiçik Qala küçəsində Qala divarları yaxınlığında tikinti işləri ilə bağlı yayılan məlumatlara cavab verib.

Cavabda bildirilir ki, ötən ilin sonundan etibarən “İçərişəhər” Dövlət Tarix-Memarlıq Qoruğu İdarəsi tərəfindən Kiçik Qala küçəsində, Qala divarları boyunca uzun illər həmin ərazidə yerləşən və abidələrə heç bir zərər yetirməyən kafe-terrasların genişləndirilməsi layihəsi həyata keçirilir. Layihə işləri qətiyyən tikinti mahiyyəti kəsb etməyərək, sadəcə şüşə və yüngül metal materialdan ibarət birmərtəbəli şüşəli qapalı və üzərində açıq yaz-yay kafe-terraslarının yaradılmasını nəzərdə tutur.

“Bu üslubda təmir-bərpa işləri Qala divarlarına heç bir zərər vurmamaqla yanaşı, nə İçərişəhərin, nə də Qala divarının dayanıqlığına və görünüşünə xələl gətirir. İstənilən miqyasda konstruksiya işləri həm daxili, həm zahiri baxımdan İçərişəhərin ənənəvi memarlıq üslubuna uyğunlaşdırılır və yalnız idarə tərəfindən təsdiqləndikdən sonra həyata keçirilir.

Həmin layihəyə aid məlumatlar 2018-ci ilin noyabrından etibarən idarənin rəsmi veb-səhifəsində mövcuddur”, - məlumatda bildirilib.