İranda bir neçə azərbaycanlı milli-mədəni fəal erməni baş kilsəsinin önündə təhlükəsizlik qüvvələri tərəfindən həbs olunub.

Axar.az xəbər verir ki, Kərimullah Nurbəxş, Nasir Məhdəvi, Bayram Məhmüdi, Əsğər Cəfəri, Rza Ağayi, Əli Ağayi, Əli İbrahimi və Söhrab Cəlilzadə adlı milli-mədəni fəallar qondarma erməni soyqırımının Tehranda keçirilməsinə etiraz etdikləri üçün saxlanılıblar.

Məlumat üçün bildirək ki, hər il ermənilərin Türkiyənin Tehrandakı səfirliyinin önündə qondarma erməni soyqırımı ilə bağlı keçirdikləri mitinq bu dəfə soydaşlarımızın fəallığı nəticəsində baş tutmayıb. İran hökuməti ermənilərə mitinqin Tehranın mərkəzində və Türkiyə səfirliyi qarşısında keçirməyə icazə verməyib.

Qeyd edək ki, güneyli millət vəkilləri, o cümlədən minlərlə ziyalı qondarma erməni soyqırımı aksiyasının keçirilməsinə qarşı başladılmış imza toplama kampaniyasına qatılaraq, etirazlarını bildiriblər. Buna görə də ermənilər aksiyaları bu gün səfirlik önündə deyil, yalnız Tehranın Kərimxan küçəsində yerləşən kilsələrində keçirə biliblər.

Güneyli soydaşlarımız hazırda kilsənin qarşısında və ətraf küçələrdə gözləyirlər. Onlar aksiyanın kilsədən kənarda keçiriləcəyi təqdirdə bunun qarşısını almağa çalışacaqlarını bildiriblər.