Vitse-spiker Bahar Muradova da Şəmkirin keçmiş icra başçısının oğlunu öldürənlərə çıxarılan hökmdən danışıb.

Axar.az xəbər verir ki, B.Muradova Lamiyə Quliyeva və keçmiş nişanlısı Vüqar Əliyevlə bağlı hökmə münasibət bildirib.

Milli Məclisin iclasında çıxış edən B.Muradova deputat İqbal Ağazadənin Azərbaycanda məhkəmə sisteminin ədalətsiz olduğunu deməsini düzgün saymayıb. Onun fikrincə, heç bir ölkədə məhkəmə sistemi ideal deyil:

"Prosesdə hakim, prokuror, vəkil, cinayəti törətmiş şəxs iştirak edir. Hər hansı prosedur pozuntusu ola bilər və mən razıyam ki, bununla əlaqədar günahı və suçu olan şəxsə qanunun gücü ilə münasibət göstərilməlidir.
Bütövlükdə isə bunu əldə rəhbər tutaraq Azərbaycanın məhkəmə sistemini şübhə altına almaq və demək ki, Azərbaycan insanı məhkəməyə güvənmir və ondan ədalət gözləmir, hesab edirəm ki, məsuliyyətsiz çağırışdır.
Və biz belə bir çağırışa laqeyd qala bilmərik. Azərbaycan məhkəməsi islahatları keçmiş sistemdir. Üç-beş çağırışın müqabilində Azərbaycan hüquq sisteminin fəaliyyətini şübhə altına almaq millət vəkilinə yaraşmaz".

L.Quliyeva və V.Əliyev sabiq başçı Aslan Aslanovun oğlu Ruslanı qətlə yetiriblər. Lamiyə 10 il, Vüqar ömürlük azadlıqdan məhrum edilib.