Dünya okeanlarında suyun səviyyəsinin qalxması narahatlıqla izlənilir.

Axar.az xəbər verir ki, bununla bağlı Dünya Bankı araşdırmalar aparıb. Məlum olub ki, 2050-ci ilə qədər dəniz suyunun səviyyəsi 40 sm qalxarsa, liman şəhərləri ümumilikdə 1 trilyon ziyana düşəcək.

Dəniz səviyyəsinin qalxması Yaponiyanın bir çox şəhəri, Amsterdam, Honq-Konq, Şanxay, Nyu York kimi şəhərlərin su altında qalmaq riskini artırır. Ona görə də bu tip liman şəhərlərində istehkamların gücləndirilməs gündəmdədir.

Qeyd edək ki, Bakı da liman şəhəridir və Xəzər dənizinin suyunun qalxması ilə sahil-bərkitmə işləri uzun illər aparılıb. Lakin son illər Xəzərin geri çəkilməsi prosesi yaşanır ki, əslində, bu da növbəti problem kimi qiymətləndirilir. Bu, Xəzərdə gəmilərin hərəkətinə, həmçinin qazma qurğularının sahilə yan almasına çətinlik yaradır, o cümlədən, dənizdəki canlıların yaşamına təhlükə törədir.

Alimlərin hesablamalarına görə, Xəzərdə qabarma və çəkilmələr 100 illik tsikllə davam edir və qarşısıalınmaz prosesdir. Hazırda Xəzərin səviyyəsinin aşağı düşməsinə əsas səbəb kimi Volqa çayının suyunun azalması göstərilir.