"Manatın devalvasiyası ilə əlaqədar söhbət çoxdan gedirdi, vaxtaşırı bu məsələni Milli Məclisdə qaldırırdıq. Mən də mütəmadi olaraq Mərkəzi Bankın İdarə Heyətinin üzvləri ilə telefonla danışırdım. Hətta 3 gün bundan qabaq Mərkəzi Bankdan dedilər ki, devalvasiya təxminən 85-90 qəpik səviyyəsində olacaq".

Axar.az xəbər verir ki, bu sözləri millət vəkili Vahid Əhmədov "Musavat.com"a geniş müsahibəsində manatın devalvasiyası barədə MB-ın qərarınını şərh edərkən deyib. Onun sözlərinə görə, Rusiyada, bütün MDB məkanında milli valyutalar ucuzlaşdığı üçün Azərbaycanda da bu müəyyən proses getməli idi: "Amma biz bu səviyyədə gözləmirdik", - deyə iqtisadçı bildirib.

Bu qərarın daxili bazarda qiymət artımını şərtləndirəcəyini vurğulayan millət vəkili qeyd edib ki, İqtisadi İnkişaf Nazirliyi qiymətlərin qalxmaması üçün hər gün hər yerdə monitorinq aparmalıdır:

"Ancaq əksər məhsullar xaricdən gəlir, ordan dollarla alıb gətirirlər. Mən bu gün bir bankla danışdım, adını çəkmək istəmirəm, kreditlərlə əlaqədar olaraq bir gecədə 24 milyon ziyana düşüblər".

Yalnız Prezidentin göstərişi ilə əvvəlki kursa qayıtmağın mümkün ola biləcəyini deyən V.Əhmədov MB-ın bu qərarının manatın sərbəst buraxılmasına bərabər bir addım olduğunu bildirib. O, bu qərarda Rusiya izini istisna etməyib:

"Çünki Azərbaycan MDB məkanında olan dövlətlərdən biridir. Bizim bu ölkə ilə iqtisadi əlaqələrimiz də çox böyükdür. Rublun kəskin dəyərdən düşməsi ola bilsin bizə də təsirini göstərir. Amma mən bunu daha çox dövlət başçısının çıxışı ilə əlaqələndirirəm. Prezident regionların sosial-iqtisadi vəziyyəti ilə əlaqədar keçirilən müşavirədə dedi ki, 1 manat 1 avro səviyyəsinə gətirilib çıxarılmalıdır. Amma çox təəssüf olsun ki, ona da baxmadılar, bu gün 1 avro 1,2 manat səviyyəsinə gətirilib çıxarılıb".