"İrəli" İctimai Birliyi Azərbaycan Respublikasının Prezidenti yanında Gənclər Fondu ilə birgə İsmayıllı rayonunda "Gənc əkinçi" layihəsinin həyata keçirilməsinə başlayıb.

Axar.az xəbər verir ki, layihədə iştiraka ölkə mətbuatını təmsil edən 30-dək gənc jurnalist cəlb olunub.

Martın 12-də layihə iştirakçıları İsmayıllı Rayon İcra Hakimiyyətində olublar. İcra hakimiyyətinin başçısı Mirdaməd Sadıqov son illər rayonda sosial-iqtisadi sahədə qazanılan uğurlardan, gənclərin cəmiyyətdə rolunun artırılması məqsədilə görülən işlərdən bəhs edib, "Gənc əkinçi" layihəsinin önəmini vurğulayıb.

"İrəli" İctimai Birliyinin sədri Mirhəsən Seyidov layihənin İsmayıllıda keçirilməsindən məmnunluğunu bildirərək, Azərbaycanda kütləvi informasiya vasitələrinə göstərilən dövlət qayğısından danışıb. Bildirilib ki, bu gün ölkədə beş mindən çox KİV qeydiyyatdan keçib. Azərbaycan artıq qlobal informasiya sisteminə qoşulub və bu da gənc jurnalistlərin biliklərinin artırılmasını, onlar arasında əməkdaşlıq əlaqələrinin möhkəmləndirilməsini zəruri edir.

Bakı Dövlət Universitetinin kafedra müdiri, professor Cahangir Məmmədli 1875-ci ildə "Əkinçi" qəzetinin nəşrə başlaması ilə Azərbaycanda milli mətbuatın təməlinin qoyulmasından, müasir dövrdə jurnalistikanın problemlərindən, əldə olunan uğurlardan danışıb.

Sonra rayon mədəniyyət evində "Gənc əkinçi" layihəsinin açılışı olub.

Layihə çərçivəsində martın 15-dək jurnalistlərə peşəkar ekspertlər və ixtisaslı kadrlar tərəfindən müxtəlif təlimlər, seminarlar keçiriləcək. Təlimlərdən sonra yaradılacaq qrupla mütəmadi işlər aparılacaq, dil kursları təşkil ediləcək. Qrupun, həmçinin gələcəkdə müxtəlif ölkələrin media orqanlarında təcrübə proqramlarına qatılması və həmin KİV-lərlə əməkdaşlığa cəlb edilməsi nəzərdə tutulur.