"Goranboy qətliamı"nı törədən şəxsin istintaqı artıq yekunlaşıb.

Rayondan Axar.az-a daxil olan məlumata görə, ailəsinin 7 üzvünü qətlə yetirməkdə təqsirləndirilən Rafiq Hüseynovun məhkəməsi başlanır. İşə Gəncə Ağır Cinayətlər Məhkəməsində baxılacaq.

O, ötən il oktyabrın 1-də rayonun Səfikürd kəndində qayınanası Diləzbər Məmmədovanın yaşadığı evə gəlib. Kürəkən ov tüfəngindən və əl qumbarasından istifadə edərək arvadı Südabəni, qayını Namiqi, qohumları Ofelya Məmmədovanı, Həvayət Məmmədovanı, Fərqanə Məmmədovanı və azyaşlı İsa Məmmədovu, habelə Diləzbər Məmmədovanı qətlə yetirib. Hadisə ailə-məişət münaqişəsi zəminində baş verib. Bir müddət sonra qardaşı Afiq Hüseynov bu hadisəyə dözməyərək özünü asaraq intihar edib. Atası Müzəffər Hüseynov isə oğlunun intiharından az sonra infarkt keçirərək vəfat edib. Onun Şaiq adlı bir oğlu da vaxtilə intihar edib.