Martın 28-də taksi sürücüsünə xəsarətlər yetirərək maşınını ələ keçirən quldur dəstə yaxalanıb. Quldurlar ayrı-ayrı rayonlardan olsa da, At yalı yaşayış sahəsində yaşayırlar.

Axar.az-a Abşeron rayon Polis İdarəsindən verilən xəbərə görə, "20 yanvar" metro stansiyası ərazisindən İntiqam Babaverdi oğlu Ağayevin taksi kimi işlətdiyi "Hyunday Elantra" markalı 90 SL 602 nömrə nişanlı avtomobilə oturaraq onu Abşeron rayonu Hökməli qəsəbəsi Atyalı yaşayış massivinə sürdürən şəxslər saxlanılıb. Həmin şəxslərin At yalı sakinləri olan 1980-ci il təvəllüdlü, Beyləqan rayonundan olan, əvvəllər məhkum olunmuş Ceyhun Nuhəli oğlu Nəsirov və 1991-ci il təvəllüdlü, Ağcabədi rayonunda qeydiyyatda olan İlqar Fərman oğlu Abbasov olduğu bildirilir.

Hər ikisi şübhəli şəxs qismində saxlanılıb. Faktla bağlı Abşeron Polis İdarəsində 181.2.1 və 181.2.5-ci maddələri ilə cinayət işi açılıb.

Avtomobil quldurlardan alınaraq sahibinə qaytarılıb.