Sumqayıt şəhərinin Koroğlu prospektində avtoyuma və yaşayış məntəqələri üçün çəkilən su borularından axan sular küçədə gölməçələrin yaranmasına səbəb olub.

Bu barədə Axar.az-ın redaksiyasına Sumqayıt şəhər sakini Səbuhi Həsənovun ünvanladığı şikayət məktubunda qeyd edilib. S.Həsənov evinin ətrafında gölməçə yarandığını və bu gölməcənin gediş-gəliş üçün ciddi problem yaratdığını bilidirib.

Məsələ ilə bağlı saytımıza açıqlama verən Sumqayıt şəhər İcra Hakimiyyətinin mətbuat katibi Eyvaz Qocayev bildirib ki, ərazidə yeni layihə icra edilir və layihə çərçivəsində sözügedən problem tezliklə aradan qaldırılacaq:

“Sumqayıt şəhərinin ən böyük ekoloji problemlərindən biri olan Acıdərə kanalının boruya alınması işləri həyata keçirilir. Hazırda Acıdərə kanalı qapalı sistemə keçirilməklə yeni məcraya salınır. Layihənin qısa müddətdə başa çatması üçün əraziyə lazımı sayda texnika və işçi qüvvəsi cəlb edilib. Qeyd edilən yer də Acıdərə kanalının keçdiyi yerə aiddir. Həmin ərazidə bu gün də işlər davam etdirilir. Qısa müddətdə problem aradan qaldırılacaq”.