Milli Məclisinin Mədəniyyət Komitəsinin sədri Qənirə Paşayeva Özbəkistan Ali Məclisi Senatının Mədəniyyət və İdman Komitəsinin sədri Bəxtiyar Seyfullayev ilə görüşüb.

Axar.az xəbər verir ki, Özbəkistandakı Heydər Əliyev adına Azərbaycan Mədəniyyət Mərkəzinin təşəbbüsü ilə Özbəkistanda keçirilən Azərbaycan mədəniyyəti və ədəbiyyatı günləri çərçivəsində baş tutan görüşdə qarşılıqlı maraq doğuran məsələlər müzakirə edilib.

Komitə sədri özbək həmkarı ilə görüş və müzakirə aparmaqdan məmnunluğunu bildirib.

Qənirə Paşayeva həmkarına Xocalı soyqırımı ilə bağlı faktları əhatə edən rəsmi materialları təqdim edib, bu mövzunu gündəmdə saxlamağı xahiş edib:

“Dünyanın bir çox ölkəsi, bəzi beynəlxalq qurumlar, parlamentlər, bələdiyyələr Xocalı soyqırımını tanıyan sənədlər qəbul edib, biz Özbəkistan parlamentindən də belə bir münasibəti arzu edirik”.

Özbəkistan Ali Məclisi Senatının komirə sədri azərbaycanlı həmkarını Özbəkistanda salamlamaqdan məmnun olduğunu bir daha bildirərək, onu 44 günlük müharibədəki tarixi Zəfər münasibəti ilə təbrik edib, qaldırılan mövzulara həssaslıqla yanaşılacağını bildirib.

Qənirə Paşayeva “Addım addı Özbəkistan” kitabını da komitə sədrinə hədiyyə edib.