Mülkümün sökülməsinə görə keçmiş həyat yoldaşıma çatacaq kompensasiyanın yarısı imzam olmadan ona verilib.

Bakının "Sovetski" məhəlləsi sakini Tamilla Mirzəyeva Axar.az-a şikayətində belə deyib. Onun sözlərinə görə, Yasamal rayon İcra Hakimiyyəti (RİH) tərəfindən fırıldağın qurbanı olub.

T.Mirzəyeva qeyd edib ki, mülk onun adınadır və keçmiş əri Çingiz Qonaqov da mənzildə qeydiyyatdadır:

"Ötən ilin noyabrında Yasamal rayon İcra Hakimiyyətinin İlham adlı nümayəndəsi mənə zəng etdi. Bildirdi ki, mənzil üçün veriləcək kompensasiyanın yarısı hazırda məhkəmə yolu ilə ayrıldığım həyat yoldaşım Çingizə verilib. İlham müəllim dedi ki, gedib lazım olan sənədləri imzalayaraq öz payımı götürməliyəm. Noyabrın 25-də pulu götürmək üçün icra hakimiyyətinə getdim.

Adımın qarşısının boş olduğunu gördüm. Məlum oldu ki, keçmiş həyat yoldaşım ona düşən payı sentyabrın 25-də imzam olmadan götürüb", - deyə şikayətçi söyləyib.

Onun dediyinə görə, Yasamal RİH-nin nümayəndəsinin əli ilə ödənildiyi iddia edilən məbləği Ç.Qonaqova Maliyyə Nazirliyinin nümayəndəsi verib:

"İcra hakimiyyətinin sektor müdiri, baş mühasib Aygün Qəribovanın yanına getdim. O da həyat yoldaşımın ona düşən payı götürdüyünü təsdiqlədi. Ancaq daha sonra bildirdilər ki, evin sahibi olduğum üçün imzam olmadan keçmiş həyat yoldaşım payını götürə bilməz".

Məsələ ilə bağlı T.Mirzəyeva Yasamal rayon icra başçısı İbrahim Mehdiyevin qəbulunda olub. İcra başçısı mülk sahibinin imzası olmadan Ç.Qonaqova ödəniş edilməsini qeyri-mümkün hesab edib:

"Mənə icra başçısının birinci müavini Səməd İslamov da bildirdi ki, yoldaşım öz payını götürüb. Pulu isə ona Maliyyə Nazirliyinin Cavanşir adlı nümayəndəsi verib. İcra başçısı mənə bildirdi ki, buna onların ixtiyarı yoxdur. Səməd İslamov isə icra başçısına yoldaşımın öz payını alması üçün mənim də imza çəkdiyimi bildirdi.

Ancaq proses tam qanunsuz olaraq həyata keçirilib. Çünki məsələdən mənim heç bir xəbərim olmayıb. Bununla əlaqədar imzamın vacibliyi bildirilməyib. Yoldaşım pulu sentyabrın 25-də alıb, məni isə icraya öz payımı götürmək üçün noyabrda çağırıblar.

Hər şeydən də elə o vaxt xəbər tutmuşam. Məni icra hakimiyyətinə öz payımı götürmək üçün imza çəkməyə İlham adlı şəxs çağırıb. İndi İlham adlı nümayəndə də, başçının müavini Səməd müəllim də yoldaşımın sentyabrda öz payını almaq üçün şəxsən guya mənim icazə verdiyimi bildirirlər".

Şikayətçi bildirib ki, problemlə əlaqədar icra hakimiyyətinə atası və qardaşı da müraciət edib. Lakin problem həllini tapmayıb. Əmlak sahibi onu da iddia edir ki, RİH nümayəndəsi olan İlham adlı şəxs onları təhqir edərək qovub:

"Məni icraya çağıran da, yalandan imza atdıran da, yoldaşıma düşəcək payı alması üçün köməklik edən də İlhamdır. İcra nümayəndəsi olmasına baxmayaraq, qardaşımla həddindən artıq kobud və nalayiq ifadələrlə danışırdı. Mənim və atamın yanında qardaşıma dəfələrlə "zatkinis alə" deyirdi".

Şikayətçi məsələ ilə əlaqədar Baş nazirin müavini Abid Şərifovun qəbulunda da olub. Abid Şərifov da T.Mirzəyeva imzası olmadan keçmiş həyat yoldaşının pul ala bilməyəcəyini bildirib.

Mənzil sahibi deyib ki, "Sovetski"də kiçik sahəli evlər üçün yeni mənzillərin verilməsi şərtindən faydalanmaq istəyir. Lakin evin yarı hissəsinin pulu keçmiş həyat yoldaşına verildiyi üçün o, yeni mənzil götürə bilmir.