Cinayət Məcəlləsinin 215.1-ci maddəsinə görə, şəxsi girov götürmə və ya saxlama 5 ildən 10 ilədək müddətə azadlıqdan məhrum etmə ilə cəzalandırılır.

Eyni əməllər qabaqcadan əlbir olan bir qrup şəxs tərəfindən törədildikdə, təkrar törədildikdə, həyat və sağlamlıq üçün təhlükəli olan zor tətbiq etməklə törədildikdə, 10-12 ilədək müddətə azadlıqdan məhrum etmə nəzərdə tutulur.

Axar.az xəbər verir ki, bunu hüquqşünas Müzəffər Baxışov toyda borca görə girov saxlanan qayınana ilə bağlı hüquqi şərh verərkən deyib. Hüquqşünas teleqraf.com-a bildirib ki, məclis səbəbkarlarından kiminsə restoran sahibi tərəfindən girov götürülməsi əməli tamah niyyəti ilə tövsif olunur:

"Cinayət Məcəlləsinin 215.2 maddəsi ilə on ildən on iki ilədək azadlıqdan məhrumetmə ilə cəzalandırıla bilər. Restoran sahibi belə vəziyyətə düşməmək üçün əvvəlcədən toy sahibi ilə müqavilə bağlamalı idi və yaranmış hər hansı xoşagəlməz vəziyyətdə məhkəməyə müraciət etməli idi. Ancaq borcun qaytarılmadığı təqdirdə vətəndaşın girov götürülməsi artıq tamah məqsədilə edilmiş cinayət sayılır ki, bu zaman restoran sahibi özü məsuliyyət daşıyır".

Qeyd edək ki, Şabranın "Savalan" restoranında keçirilən kiçik toy məclisində xoşagəlməz hadisə yaşanıb. Toy sahibinin qayınanası girov götürülüb.