Qızımın ölümünə səbəb olanlar layiqli şəkildə cəzalanmalıdırlar. Bu günə kimi məsuliyyət daşıyan həkimlər barədə hər hansı cəza tədbiri görülməyib. Səhiyyə Nazirliyi və başqa qurumlara yazılı müraciət etsəm də, cavab gəlməyib.

Axar.az xəbər verir ki, bunu burnundan əməliyyat olunan zaman ölən tələbə Leyla Mürsəlovanın atası deyib.

Namiq Mürsəlov interaztv.com-a bildirib ki, övladını "Starmed" klinikasının plastik cərrahı Sənan Mehdiyev əməliyyat edib. Məlumata görə, Leyla əməliyyatda verilən yüksək dozalı narkozdan dünyasını dəyişib.

Səhiyyə Nazirliyindən bildirilib ki, Bakı şəhər Baş Prokurorluğu işi araşdırır. Klinikanın baş həkimi və əməliyyatı həyata keçirən cərrahı isə açıqlama vermək istəməyib. Mərhum Maliyyə-İqtisad Kollecinin 3-cü kurs tələbəsi olub.