Yunayted Kredit Bank ASC-nin müdiri vətəndaşın banka yatırdığı külli miqdarda pulu mənimsəyib.

Baş Prokurorluqdan Axar.az-a verilən məlumata görə, bankın Gəncə filialının əməkdaşının qanunsuz əməlləri barədə Gəncə şəhər sakininin müraciəti Baş prokuror yanında Korrupsiyaya qarşı Mübarizə Baş İdarəsində araşdırılıb.

Araşdırmalarla filialın sabiq müdiri Nərminə Dərgahzadənin vəzifə səlahiyyətlərindən sui-istifadə etdiyi məlum olub. O, bankın elektron sənəd hesabatlarına yanlış məlumatlar daxil edərək Gəncə şəhər sakininin adına rəsmiləşdirilmiş 40 min ABŞ dolları mənimsəyib.

Fakta görə Cinayət Məcəlləsinin 179.3.2 (külli miqdarda mənimsəmə və ya israf etmə), 308.1 (vəzifə səlahiyyətlərindən sui-istifadə) və 313-cü (vəzifə saxtakarlığı) maddələri ilə cinayət işi başlanıb.

Hazırda cinayət işi üzrə istintaq davam etdirilir.