11:54

Bakıda dəhşətli qətl hadisəsi baş verib.

Yasamal Rayon Prokurorluğundan verilən məlumata görə, 40 yaşlı Kamran Mahmudovun itkin düşməsi barədə məlumat araşdırılarkən məlum olub ki, onu həyat yoldaşı 39 yaşlı Lalə Mahmudova və həyat yoldaşının Sədi adlı tanışı qətlə yetirib.

Lalə tanışı Sədi ilə birlikdə meyiti hissələrə bölərək İsmayıllı rayonunda meşəlik sahədə basdırıb.

Qətlin təfərrüatını Lent.az yayıb. Saytın hüquq-mühafizə orqanlarından əldə etdiyi məlumata görə, bir neçə gün əvvəl paytaxt sakini Kamran Mahmudovun itkin düşməsi ilə bağlı həyat yoldaşı, 1975-ci il təvəllüdlü Lalə Mahmudova polisə şikayət edib. Məlum olub ki, K.Mahmudova məxsus olan BMV markalı avtomobil də yoxa çıxıb.

Avtomobil İsmayıllı rayonu ərazisində tapılıb. Məlum olub ki, L.Mahmudova tanışı Sədi Məmmədovla birgə həyat yoldaşını İzmir prospekti 5/55 ünvanındakı mənzildə qətlə yetirib. Daha sonra S.Məmmədov K.Mahmudovun cəsədini elə ona məxsus olan avtomobilin baqajına qoyaraq doğulduğu İsmayıllı rayonunun Talıstan kəndi yaxınlığına gətirib və onu hissələrə bölərək basdırıb. O, avtomobili elə meşədəcə qoyaraq ərazidən uzaqlaşıb.

Hüquq-mühafizə orqanlarının apardığı əməliyyat-axtarış tədbirləri nəticəsində cinayətin üstü açılıb və L.Mahmudova ilə S.Məmmədov törətdikləri əməli etiraf ediblər. Dünən gecə saatlarında S.Məmmədov meyiti hissələrə bölərək basdırdığı yeri göstərib və K.Mahmudovun meyiti çıxarılıb.

Hazırda faktla bağlı başlanmış cinayət işinin istintaqı davam etdirilir.

Qeyd edək ki, K.Mahmudovun L.Mahmudova ilə nikahından iki övladı qalıb.