Fakt Araşdırıcı - N MMC ilə bağlı cinayət içi açılıb. Firmanın mağazalarda qanunsuz yoxlama apararaq, sahiblərindən pul tələb etməsi müəyyən olunub.

Bu barədə Baş Prokurorluqdan Axar.az-a verilən məlumata görə, MMC-nin əməkdaşlarının qanunsuz hərəkətləri barədə İqtisadiyyat və Sənaye Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidmətindən məluat daxil olub.

Bu materiallar Baş prokuror yanında Korrupsiyaya qarşı Mübarizə Baş İdarəsində araşdırılıb. Araşdırmalar zamanı cəmiyyətin üç əməkdaşı tərəfindən 22 sentyabr 2015-ci il tarixdə paytaxtın Yasamal rayonu ərazisində yerləşən mağazada yoxlama apardıqları məlum olub.

Araşdırma zamanı mağazada istifadə müddəti bitmiş ərzaq məhsullarının satışı qeydə alınıb. Lakin MMC əməkdaşları bu fakta görə mağaza sahibini külli miqdarda cərimə etməyib və bu barədə aidiyyəti təşkilatları məlumatlandırmayıb.

MMC əməkdaşları mağaza sahiblərinə təmsil etdikləri cəmiyyətlə müqavilə bağlayıb qanunsuz ödəniş təklif ediblər.

Fakta görə Cinayət Məcəlləsinin 309.1-ci (vəzifə səlahiyyətlərini aşma) maddəsi ilə cinayət işi başlanıb. Hazırda cinayət işi üzrə istintaq tədbirləri davam etdirilir.

Qeyd edək ki, İqtisadiyyat və Sənaye Nazirliyi sahibkarları onları hədələyən bu MMC-yə qarşı diqqətli olmağa çağırmışdı. Nazirlikdən Axar.az-a verilən məlumata görə, ticarət obyektlərindən ödənişli müqavilə bağlanmasını tələb edən şəxslər peyda olub.

Onlar mağazalardan ödənişli müqavilə tələb edir. Bununla bağlı İqtisadiyyat və Sənaye Nazirliyi araşdırma aparıb.

Məlum olub ki, özlərini Fakt Araşdırıcı-N MMC-nin əməkdaşları kimi təqdim edən şəxslər ticarət obyektlərinin fəaliyyətinə yoxlama adı ilə qanunsuz müdaxilə edir.