Bakı və şəhərətrafı yollarda rabitə-kommunikasiya xidmətlərinə məxsus quyuların qapaqlarını oğurlayan şəxslər tutulub.

Daxili İşlər Nazirliyinin mətbuat xidmətindən Axar.az-a verilən məlumata görə, Azəryolservis ASC Daxili İşlər Nazirliyinə müraciət edərək paytaxtın mərkəzi küçə və prospektlərində, yollarda rabitə-kommunikasiya xidmətlərinə məxsus quyuların qapaqlarının oğurlanması barədə məlumat verib.

Dərhal həyata keçirilən təxirəsalınmaz tədbirlərlə bu qəbildən olan silsilə oğurluqları törətməkdə şübhəli bilinən İmişli rayon sakini, əvvəllər məhkum olunmuş Müşfiq Həsənov və Bərdə rayon sakini Ülfan Alıyev saxlanılıb.

İlkin dindirmə zamanı onlar cinayət törədərkən M.Həsənovun idarə etdiyi VAZ-2107 markalı avtomaşından istifadə etdiklərini bildiriblər. Son iki ay ərzində yağış sularının axıdılması üçün quraşdırılan 70-ə yaxın dəmir barmaqlıqları oğurladıqlarını etiraf ediblər.

Faktla bağlı Cinayət Məcəlləsinin müvafiq maddələri ilə cinayət işi başlanılıb, istintaq aparılır