Bakıda odlu silah alğı-satqısı, narkotik vasitə və saxta ABŞ dollarının qanunsuz dövriyyəsi ilə məşğul olan şəxslər ifşa edilib.

Axar.az xəbər verir ki, Astara rayon sakini Zaur Əliyevin AKSU markalı avtomatı, patron darağını və 114 ədəd müxtəlif çaplı patronları istintaqa məlum olan şəxsə 1500 manata satması müəyyən edilib.

Tədbirin davamı olaraq Zakir Əliyev 1 ədəd qumbaranı həmin şəxsə 300 manata satmaq istəyən zaman yaxalanıb.

Region TV xəbər yayıb ki, Zəngilan Rayon Polis Şöbəsi və Mütəşəkkil Cinayətkarlıqla Mübarizə Baş İdarəsi əməkdaşlarının birgə keçirdikləri daha bir əməliyyat tədbiri ilə Astara sakinləri - Elşən Ağalı, Röyal Əliyev, eləcə də Bakı sakinləri Tural Səfərov və Hüseynağa Əsgərov da tutulublar.

E.Ağalının paytaxtın Səbail rayonu ərazisində kirayədə yaşadığı evə baxış zamanı oradan ümumi çəkisi 3 kiloqrama yaxın narkotik vasitə olan heroin, tiryək və həşiş, eləcə də 22300 saxta ABŞ dolları aşkar edilərək götürülüb.

İlkin dindirmə zamanı narkotik vasitələri bir müddət əvvəl satış məqsədi ilə İrandan qaçaqmalçılıq yolu ilə gətirdiyini, saxta pulların isə ona satmaq məqsədilə Hüseynağa Əsgərov tərəfindən verildiyini bildirib.

E.Ağalı deyib ki, əvvəl də məhkumluq həyatı yaşayıb: "Orda da bir iranlı ilə tanış olmuşam. Çıxandan sonra da onunla əlaqəm olub. Gedib oradan Bakıya satmaq üçün narkotik, tiryək, heroin, həşiş qətranı gətirmişəm".

Hazırda cinayətin digər iştirakçılarının da tapılıb tutulmaları və məsuliyyətə cəlb olunmaları istiqamətində zəruri istintaq hərəkətləri və əməliyyat-axtarış tədbirləri davam etdirilir.