Məni təhqir etdi. Dedim ki, Anar, o söyüşünü sənə yedizdirəcəyəm.

Axar.az xəbər verir ki, bu sözləri Bakıda 20 yaşlı Səringül Ramazanova boğazını kəsib öldürdüyü 31 yaşlı Anar Məmmədov haqda deyib.

Qətlin söyüş üstündə baş verdiyini söyləyən gənc qız əməlindən peşman olmadığını açıqlayıb. Region TV-nin hazırladığı sujetdə Səringül hadisə ilə bağlı detalları belə danışıb:

"Məni şillələməyə başladı. Bu, mənə lap pis təsir etdi. Bıçağı götürüb üstünə yeridim. Bıçağı qarnına soxmaq istəyəndə, obyektin sahibi gəldi. Əlimi geriyə çəkəndə oğlanın boğazı kəsildi. Mənim nəslimi söydü, peşman deyiləm".

Təqsirləndirilən şəxsin sözlərinə görə, başqası olsaydı da, eyni şeyi edərdi:

"Ailəmdən biri də mənim var-yoxumu söysəydi, onu da yaşatmazdım".

Yada salaq ki, hadisə Novxanı qəsəbəsi ərazisindəki kafelərdən birində qeydə alınıb.

Xaçmaz sakini olan S.Ramazanova Bakı sakini A.Məmmədovun boyun nahiyəsindən bıçaqla xəsarət yetirib. Yaralı dərhal xəstəxanaya çatdırılıb. Həkimlərin müdaxiləsinə baxmayaraq, şah damarı kəsildiyi üçün həyatını xilas etmək mümkün olmayıb.

Faktla bağlı cinayət işi açılıb, araşdırma aparılır.