Mingəçevirdə iki qardaşı güllələyən 31 yaşlı Şakir Əhmədovun axtarış tədbirləri davam etdirilir.

Bu barədə Axar.az-a Mingəçevir Şəhər Polis Şöbəsininin növbətçi hissəsindən bildirilib.

Polis Şöbəsindən deyilib ki, Ağdam sakini Bəxtiyar Rəhimovu öldürüb, qardaşı Rövşən Rəhimovu yaralayan qatillə bağlı araşdırma davam edir.

Polisdən Ş.Əhmədovun cinayəti hansı səbəbdən törətməsinin məlum olmadığın qeyd olunub.

Yada salaq ki, Mingəçevirdə məcburi köçkünlər üçün salınmış qəsəbədə silahlı insident baş verib.

Hadisə şahidlərinin ANS-ə verdiyi məlumata görə, Ağdam rayonundan məcburi köçkün olan 31 yaşlı, Ağdam köçkün məktəblərinin birində fizika müəllimi işləyən Ş.Əhmədov həmyerlisi B.Rəhimova hələlik məlum olmayan səbəbdən silahla atəş açıb.

Daha sonra onun qardaşı R.Rəhimovu da əlindən və ayağından güllələyib. Sinəsindən iki güllə yarası alan B.Rəhimov xəstəxanaya gedərkən yolda keçinib.

Mərhumun atası Elmidar Rəhimovun sözlərinə görə, əvvəllər oğlanları ilə hadisəni törədən şəxsin arasında heç bir münaqişə yaşanmayıb. Əksinə uzun müddət qonşu kimi normal münasibətləri olub.

Mərhum ailəli olub. İki azyaşlı övladı var.

Faktla bağlı Mingəçevir şəhər prokurorluğunda cinayət işi açılıb, araşdırma aparılır.