Daxili İşlər Nazirliyi Baş Mütəşəkkil Cinayətkarlıqla Mübarizə İdarəsinin əməkdaşları narkotik əməliyyatı keçirib.

Axar.az DİN-nin saytına istinadla xəbər verir ki, narkotik maddələrin qanunsuz dövriyyəsi ilə məşğul olan Şirvan sakini Səbuhi Məmmədov, Hacıqabul sakinləri - Güləhməd Mirzəyev və Natiq Kazımov saxlanılıb.

Keçirilən tədbirlərlə onların Gülnar adlı şəxs vasitəsi ilə barələrində rüsvayedici videolar yayacaqları hədəsilə bir neçə vətəndaşdan külli miqdarda pul almaları müəyyən edilib.

Əməliyyat tədbirlərinin davamı olaraq Baş İdarə əməkdaşları tərəfindən Şirvan sakini Gülnar Əhmədova da tutularaq istintaqa cəlb edilib.

Faktla bağlı Baş İdarənin İstintaq Şöbəsində cinayət işi başlanıb, araşdırmalar davam etdirilir.

Qeyd edək ki, dəstə üzvlərinin cinayət əməllərindən zərərçəkən başqa şəxslər varsa, bu barədə aidiyyəti üzrə polis orqanlarına və ya 012-590-66-58 nömrəsinə zəng edərək məlumat verə bilərlər.