Gömrükdə qaçaqmalçılıq yolu ilə soyuq silahlar gətirənlər saxlanılıb.

Dövlət Gömrük Komitəsindən Axar.az-a verilən məlumata görə, ayrı-ayrı vaxtlarda Antalya-Bakı aviareysi ilə gələn Azərbaycan vətəndaşları Fərid Həsənbəyov və Tural Səmədzadə yoxlanılıb.

Monitorda dəyənəyə oxşar əşyaların təsvirləri görünüb. Təkrar yoxlama zamanı F.Həsənbəyova məxsus çantanın içərisindəki şəxsi əşyaların arasından 3 ədəd, T.Səmədzadənin çantasındakı şəxsi əşyaların arasından isə 1 ədəd metaldan hazırlanmış dəyənəklər aşkar edilib.

Ədliyyə Nazirliyi Məhkəmə Ekspertizası Mərkəzinin arayışına əsasən, ekspertizaya təqdim edilən həmin predmetlər dəyənək tipində kustar üsulla hazırlanmış, vurucu-əzici xassəyə malik soyuq silahlardır. Hər iki faktla bağlı təhqiqat aparılır.