6 noyabr radio və televiziya işçilərinin peşə bayramı günü münasibətilə bu sahədə çalışan bütün dostları təbrik edirəm, hər birinə uğurlar arzulayıram.

Axar.az xəbər verir ki, bu sözləri Milli Televiziya və Radio Şurasının Monitorinq şöbəsinin müdiri Təvəkkül Dadaşov öz Feysbuk səhifəsində yazıb.

O, bəzi TV mütəxəssislərimizin bu prosesdə aktiv iştirak etmədiyindən təəssüf hissi keçirdiyini bildirib:

"Azərbaycan televiziyası və radiosu həqiqətən də böyük inkişaf yolu keçib və şərəfli tarix yazıb. Azərbaycan xalqının milli dəyərlərinin, dilinin, mədəniyyətinin qorunub saxlanmasında müstəsna tarixi xidmətlər göstərib. Amma təəssüf ki, bu gün teleradio sahəsi müəyyən problemlər yaşayır və cəmiyyətdə bu sahə ən çox tənqidə məruz qalanlardandır. İnşallah, mütəxəssislərin, səlahiyyətlilərin, həmçinin yaradıcı insanların birgə səyi ilə teleradio sahəsi mövcud problemlərini aradan qaldıra və beləliklə də tənələri öz üzərindən ata biləcək.

Lakin onu da təəssüflə qeyd etməyə bilmərik ki, bəzi TV mütəxəssislərimiz bu prosesdə aktiv iştirak etmir, müəyyən korporativ maraqlardan çıxış edirlər. Bu korporativ maraqlar bəzilərinin TV-lərdə tutduqları vəzifələrdən, bəzilərinin isə sadəcə TV-lərlə münasibətləri pozmamaq niyyətindən irəli gəlir".

Xatırladaq ki, bu gün Azərbaycanda Radio və Televiziya İşçilərinin peşə bayramı günü kimi qeyd olunur. 1926-cı il noyabrın 6-da Azərbaycan radiosu fəaliyyətə başlayıb və o gündən sözügedən tarix radio işçilərinin peşə bayramı günü kimi qeyd olunur.