Bakıda taksi sürücüsünə hücum edən şəxs tutulub.

Axar.az-ın verdiyi məlumata görə, bir neçə gün əvvəl Fuad Şirəliyevin idarə etdiyi 90 AD 790 dövlət nömrə nişanlı avtomobili qaçıran adam Qaradağ Rayon Polis İdarəsi əməkdaşları tərəfindən həbs olunub.

Adı açıqlanmasa da, həmin şəxs barəsində cinayət işinin açıldığı bildirilir. Qeyd edək ki, naməlum şəxs taksi şoferinin maşınına oturub, Salyana getməli olduğunu söyləyib. Tərəflər razılaşıb, yola düşüblər.

Müştəri Lökbatan yolunda taksini saxlatdırıb, arxa oturacaqda çantasından əşya götürəcəyini söyləyib. Sonra arxa oturacağa keçər-keçməz çantasındakı çəkiclə taksi sürücüsünün başından vurub.

Sürücüyə xəsarət yetirən naməlum şəxs 90 AD 790 dövlət nömrə nişanlı maşını qaçırıb, sahibini isə yolun kənarına atıb. Avtomobilin içində taksi sürücüsünün sənədləri, mobil telefonu və pulu olub.