Gömrükçülər 2 kiloqrama qədər heroinin ölkə ərazisinə keçirilməsinin qarşısını alıb.

Dövlət Gömrük Komitəsindən Axar.az-a verilən məlumata görə, narkotik vasitə İrandan gələn Azərbaycan vətəndaşı Emin Məmmədovun avtomobilində aşarkanıb.

Astara Gömrük İdarəsinin əməkdaşları ona məxsus "Mersedes Benz-200" markalı, 90-GB-883 nömrəli minik maşında yoxlama aparıb.

Yoxlama xəttində avtomobilə gömrük nəzarətini həyata keçirən zaman "Mimi" ləqəbli kinoloji xidmət iti nəqliyyat vasitəsinin salonuna reaksiya verib.

Bunu nəzərə alan gömrükçülər qanunvericiliyin tələbinə uyğun olaraq nəqliyyat vasitəsinə baxış keçirib.

Yoxlama zamanı avtomobilin salonunda, alətlər panelinin arxasında qara rəngli kauçuk məmulatına bükülü vəziyyətdə 1 kiloqram 850 qram heroin aşkar edilərək götürülüb. Faktla bağlı araşdırma aparılır.