2016-cı ilin ilk altı günü qanlı və amansız cinayətlərlə yadda qaldı.

Axar.az yanvarın 1-dən etibarən törədilən dəhşətli qətl və kriminal hadisələrin statistikasını hazırlayıb.

Bayram günü Şirvanda ər arvadına 9 bıçaq zərbəsi vurdu. Hadisə şəhərin Hacı Zeynalabdin Tağıyev küçəsində qeydə alındı. 1994-cü il təvəllüdlü Xanpəri Hüseynova həyat yoldaşı, Salyan sakini, 1981-ci il təvəllüdlü Aslan Əsədov tərəfindən bıçaqlandı. 21 yaşılı qadın ağır vəziyyətdə Şirvan Şəhər Xəstəxanasına çatdırıldı.

Paytaxtın Nizami rayonunda isə taksi sürücüsü, 30 yaşlı Həmdulla Ağayev naməlum şəxs və ya şəxslər tərəfindən bıçaqlandı. Yaralı təcili tibbi yardım briqadası tərəfindən xəstəxanaya çatdırıldı.

Şəhərin Cəfərov qardaşları küçəsində 61 yaşlı Həsənağa Binnətov çiyinindən aldığı kəsilmiş-deşilmiş xəsarətlə Kliniki Tibbi Mərkəzə yerləşdirildi. Məlum oldu ki, 61 yaşlı kişini anası, 1932-ci il təvəllüdlü Ayna Abbasova bıçaqlayıb. 83 yaşlı ana oğluna mübahisə zəminində bıçaqla xəsarət yetirib.

İlin dəhşətli qətllərindən biri isə Füzulidə baş verdi. Rayonun Balabəhmənli kənd sakini, 1978-ci il təvəllüdlü Gəncəvi Sadıqov arvadı, 1984-cü il təvəllüdlü Vüsalə Əsədovanın bıçaqla boğazını kəsdi. 32 yaşlı qadının həyatını xilas etmək mümkün olmadı.

İlkin ehtimala görə, hadisəyə səbəb ailə-məişət mübahisəsi olub. Vüsalə evin istilik sistemindən şikayətlənərək, ona soyuq olduğunu bildirib. Bu şikayət Gəncəvinin xoşuna gəlməyib və birincinin ölümü ilə nəticələnib.

Növbəti səs-küylü qətl isə Bakıda qızıl satanın amansızlıqla öldürülməsidir. "Jevelleri" zinət əşyaları mağazasının sahibəsi Məryəm Namədzadəyə 43 bıçaq vuruldu. Qətlin səbəbi bilinmir, hadisəni törədənlər tapılmayıb.

Bakının gecə klubunda isə iki nəfərin mübahisəsi qətllə nəticələndi. 1980-ci il təvəllüdlü Sadiq Fətullayev 1989-cu il təvəllüdlü Tural Abbasovu bıçaqla öldürdü.

Səhər saat 6 radələrində Bülbül prospektində yerləşən "Kofein-klub"da başlanan dava metronun "Sahil" stansiyası yaxınlığında davam edib. Sadiq Turalı bıçaqlayaraq hadisə yerindən qaçıb.

Nəhayət, paytaxtın Maştağa qəsəbəsində kürəkən arvadını, baldızını və qayınanasını bıçaqladı.İlham Qurbanov arvadı Mədinə Qurbanova, baldızı Aynurə Əliyeva və qayınanası Çimnaz Əliyevaya çoxsaylı bıçaq xəsarətləri yetirdi. Hər üç yaralı 3 saylı Şəhər Klinik Xəstəxanasındadır.