Bu gün Bakı Ağır Cinayətlər Məhkəməsində dələduzluqda təqsirləndirilən Bakı şəhər sakini 1969 təvəlüdlü Roza Abbasovanın cinayət işi üzrə məhkəmə prosesi yekunlaşıb.

Axar.az xəbər verir ki, hakim Faiq Qəniyevin sədrliyi ilə keçirilən prosesdə hökm oxunub.

Məhkəmənin qərarı ilə Roza Abbasova 9 il müddətinə azadlıqdan məhrum edilib.

Qeyd edək ki, Roza Abbasova Sədərək Ticarət mərkəzində işləyib. O, onunla birlikdə çalışan vətəndaşların etibarından sui-istifadə edərək 143 min manat alıb. Türkiyəyə gedərək onlara mal vuracağını söz verən qadın sözünün üstündə durmayıb.

Araşdırma zamanı məlum olub ki, qadın silsilə dələduzluqla məşğul olub. Cinayət işində 15 nəfərə yaxın zərərçəkən var. O, bir çox şəxsə ticarətə şərik olmaq adı ilə dələduzluq edib.

Roza Abbasova Cinayət Məcəlləsinin 178.3.2 (külli miqdarda dələduzluq) maddəsi ilə ittiham edilib.