Mənim İctimai TV məsələmdə anlaşılmazlıq yaranmışdı. Hazırda İTV-də fəaliyyətimi davam etdirirəm.

Bu sözləri tanınmış şair Məmməd İsmayılın qızı İntizar İsmayıl İTV-dən işdən çıxarılması və bunun AzTV rəhbərliyinin qərarıyla olması haqda yayılan xəbərlə bağlı Axar.az-a danışarkən deyib. O, sözügedən iddiaların əsassız olduğunu bildirib:

"Bu məsələnin AzTV sədri Arif Alışanova heç bir aidiyyəti yoxdur. Mən onu çoxdan tanıyıram. Atam şair Məmməd İsmayıl Arif müəllimə yaxşı münasibət bəsləyir və A.Alışanov atasına görə övladını işdən çıxaran şəxslərdən deyil. Mən özüm də atama görə cavabdeh deyiləm.

Anam əməliyyat olunarkən saytdan atama Qulu Məhərrəmlinin adından zəng olub və sual verilib. Atam da stressdə olduğundan nə cavab verəcəyini bilməyib".

Qeyd edək ki, bir müddət əvvəl şair Məmməd İsmayılın qızı İntizar İsmayıl İTV-dən çıxarılmışdı. Məlumata görə, o, atası Məmməd İsmayılın AzTV sədri Arif Alışanovu nəzərdə tutaraq "mühasibdən televiziya rəhbəri olmaz" deməsinə görə işdən azad olunmuşdu.