Bakıda 33 yaşlı birjaçı Alışan Nizaminin 3 sahibkarın 4 milyondan çox pulunu ələ keçirmə ittihamı ilə həbs edildiyi barədə məlumat vermişdik. Məlumata görə o, Cinayət Məcəlləsinin 178.4-cü (dələduzluq-xüsusilə külli miqdarda ziyan vurmaqla törədildikdə) maddəsi ilə ittiiham edilir. Alişan Nizami Amerika Birləşmiş Ştatlarında yaşayan müğənni Elariz Məmmədoğlunun kürəkənidir.

Axar.az xəbər verir ki, Globalinfo.az-a danışan Elariz Məmmədoğlu xəbəri saytdan oxuduğunu bildirib.

O, incəsənət adamı olduğunu qeyd edib:

“Çox qəribədir, niyə soruşmurlar ki, Babək Məmmədzadə, Zeynal Usubov, Yadigar İsrafilov bu qədər pulu hardan əldə edib? Şər və böhtan atmaq asan bir işdir indiki vaxtda. Heç kim vicdan əzabı çəkmir. Mən Elariz Məmmədoğlu neçə ildir məşhur müğənni statusundayam, amma bu qədər vəsaiti təsəvvür edə bilmirəm”.

E.Məmmədoğlu belə halların ondan gizlədildiyini deyib:

“Bilmirəm, mən yaradıcı insan, incəsənət adamı olduğum üçün belə şeyləri məndən gizlədirlər. Yalnız sizdən öyrəndim”.

Xatırladaq ki, Alişan Nizami AzTV-nin keçmiş sədri Arif Alışanovun qardaşı oğludur. O, əvvəllər AzTV-də işləyib. A.Nizaminin atası Akif Alışanov polis polkovniki rütbəsi ilə yüksək vəzifələrdə çalışıb. O, Sumqayıt Mühafizə İdarəsinin rəisi işləyib. Sonuncu iş yeri Müdafiə Sənayesi Nazirliyində Mühafizə və təhlükəsizlik şöbəsinin rəisi vəzifəsi olub. Bir neçə il öncə dünyasını dəyişib.