Zaqatalada ADU məzunlarının professionallıq və peşə vərdişlərinin təkmilləşdirilməsi konfransı keçirilib.

Axar.az xəbər verir ki, rayona səfər edən Azərbaycan Dillər Universitetinin rektoru, akademik Kamal Abdulla və universitet kollektivi konfransdan öncə Ulu öndər Heydər Əliyevin büstünü ziyarət edib, önünə gül dəstələri qoyulublar.

Konfransın açılış mərasimində ADU-nun rektoru, akademik, xalq yazıçısı Kamal Abdulla məzunlarla işin düzgün qurulmasının, onların diqqətdə saxlanılmasının vacibliyindən danışıb:

“Məzunlarla görüşmək bizim üçün sevindirici haldır. Hesab edirik ki, məzunlarla görüş onların peşə vərdişlərinə və peşəkarlıq səviyyəsinə öz müsbət təsirini göstərir. Bizi düşündürən məsələlər əsasən məzunlarımızın pedaqoji fəaliyyətini dəstəkləmək, onları yeni tədris metodları ilə qarşılıqlı şəkildə tanış etməkdir. Keçiriləcək seminarlar, təlimlər, görüşlər gələcək elmi əməkdaşlıq üçün də əlverişli imkanların yaradılması deməkdir. Ulu öndər Heydər Əliyevin tələbələrlə bağlı fikrini daima xatırlayır və səsləndirirəm. Ulu öndər Heydər Əliyev tələbələrlə görüşündə üzünü bizə tutub demişdi: Bu tələbələr mənim sizə əmanətimdir. Bu fikir bizim təhsil strategiyamızın əsas ideyasına çevrilib”.

ADU-da tədris olunan xarici dillər haqqında məlumat verilib. QS reytinqlər cədvəlində ADU-nun uğurları barədə danışılıb. Qeyd olunub ki, ADU son illər beynəlxalq əlaqələrin qurulmasında da fəallığı ilə seçilir. Bu da təhsilin keyfiyyətinə və tədrisin müasir metodlarla aparılmasına mühüm təsir göstərir.

Konfransda rayon icra başçısı Mübariz Əhmədzadə, Milli qəhrəman Mübariz İbrahimov adına Biləsuvar rayon bağça-lisey kompleksinin direktoru Aqşin Bağırov, ADU-nun Təhsil fakültəsinin dekanı, professor Hikmət Əlizadə, Şəki-Zaqatala Regional Təhsil İdarəsinin müdiri Günay Mahmudova çıxış edib, şagirdlərin təlim-tərbiyəsi, bilik və bacarıqlarının artırılması istiqamətində dövlət siyasətinə uyğun işlərin aparılmasından danışılıb. ADU-nun regional konfransının altı rayonu əhatə etməsi və bununla da xarici dilləri tədris edən müəllimlərin pedaqoji fəaliyyətini dəstəkləmək baxımından önəmi vurğulanıb.