"Aztech" şirkətinin ( “Azerbaijan Technologies” Firması) zəmanət talonuna qanunvericiliklə nəzərdə tutulmuş hüquqlarla müqayisədə istehlakçıların hüquqlarını məhdudlaşdıran şərtlər daxil etdiyi aşkarlanıb.

Axar.az Teleqraf-a istinadla xəbər verir ki, bununla şirkət “İstehlakçıların hüquqlarının müdafiəsi haqqında” Qanununun 7-ci və 16-cı maddələrini kobud şəkildə pozub.

Antiinhisar və İstehlak Bazarlarına Nəzarət Dövlət Agentliyindən bildirilib ki, "Aztech" şirkəti İnzibati Xətalar məcəlləsinin müvafiq maddəsinə əsasən cərimələnib.

Qeyd edək ki, məcəlləyə əsasən bu halda fiziki şəxslər üç yüz əlli manatdan beş yüz manatadək məbləğdə, vəzifəli şəxslər min beş yüz manatdan iki min manatadək məbləğdə, hüquqi şəxslər dörd min manatdan altı min manatadək məbləğdə cərimə edilirlər.