Ukrayna Prezident Ofisinin rəhbəri Andrey Yermak Vaşinqtonda ABŞ-ın Ukrayna və Rusiya üzrə xüsusi nümayəndəsi Keyt Kelloqla görüşüb.

Axar.az xəbər verir ki, A.Yermak bu barədə özünün Teleqram kanalında məlumat verib.

“Cəbhədəki vəziyyəti, İstanbuldakı görüşlərin nəticələrini, Rusiyaya qarşı sanksiyaların gücləndirilməsinin vacibliyini və Ukraynaya müdafiə yardımını müzakirə etdik”, - o yazıb.

Bundan başqa, onun sözlərinə görə, tərəflər Rusiyanın ukraynalı uşaqları geri qaytarması məsələsini müzakirə ediblər: "Biz Rusiyaya siyahıları vermişik, cavab gözləyirik - onların evə qaytarılması vacibdir. Bu, mühüm məsələdir, biz ABŞ-ın prosesdə iştirakını yüksək qiymətləndiririk".

Yermak Kelloqa onu da bildirib ki, Ukrayna rəhbərliyinin fikrincə, Rusiya müharibəni davam etdirmək üçün əlindən gələni edir və buna görə də ona güc yolu ilə son qoymaq lazımdır.