İran Azərbaycanının ölkəmizdə də tanınan yazarı, "Ədəbi Azadlıq" müsabiqəsinin qalibi Ruqəyyə Kəbirinin Axar.az-a göndərdiyi bu analitik yazının indiki informasiya savaşı boğanağında önəmini nəzərə alıb oxucularımıza təqdim edirik.

Bütün dünyanı öz vəhşilikləri ilə vahiməyə salan "İraq Şam İslam dövləti" terrorçu qruplaşmasının baş kəsməkdən, qan tökməkdən başqa daha hansı vəhşilikləri və ağlasığmaz əməlləri var? Bu yazıda həmin suala cavab tapacağınızı güman edirik.

"Nikah cihadı, yoxsa cihad cariyəsi?"

Bu günlər ağlımı qarışdıran mövzular çox olsa da "nəfs nikahının cihadı" və "livat cihadı" (Livat - Sodom - qeyri-ənənəvi cinsi əlaqə. - red) kimi sözləri oxuyanda, deyirəm, bəlkə gözlərim karıxır, yaxud ağlım bu sözlərin mənalarını başqa sözlərlə çaş salır?

Nikah cihadının (seksual inqilab – red.) xəbərini oxuduğumda dəfələrlə özümdən soruşdum: "Qadın insandır, yoxsa cinsəl istəkləri təmin edən bir makina?"

Barbarlıq dönəmini arxada qoyub, zamanın XXI yüzilində yaşasaq belə, dünyanın bütün olaylarıyla bərabər, cinsəl istək‎lər -istər gizli, istərsə aşkar - və bu istəklərdən törənmiş modern səviyyədə insan alveri, özəlliklə qadın və uşaq, həmişə söz qonusu olub.

Bu günlər fotbol üzrə Dünya Çempionatı və İŞİD terrorçularının hərəkatı məkanca ayrı-ayrı yerlərdə olsalar da, zamanca eyni vaxtda üz verir. Üstəlik, günümüzdə futbol və qadın ticarətinin xəbərləri, bir-birilə çiyinbəçiyin getsə də, futbol və onun arxa planındakı qadın ticarətindən hələ söz açmıram. Qadın ticarətinə görə ətraflı tədqiqatlar gərəkirsə də, ancaq bu yazının söz qonusu, rəsmi bir fitva kimi yox, lakin ağızlarda gəzən nikah cihadının (İşidlər hər hansı şəhəri alandan sonra orda elan edirlər ki, ərsiz və subay qızları az müddət üçün onların əsgərlərinin nikahına gətirsinlər ki, onlar cinsəl istəklərini şəriət yoluyla yerinə yetirsinlər) elanıdır.

Günümüzə qədər özünü göstərdiyi kimi cihad, savaş və dava-dalaş işləri dünyanın hər yerində, o cümələdən Ortadoğuda da kişiyana işlərdən biri sayılıb. Kişilər güya ki, yalnız savaş qürurlarını deyil, cinsi istəklərini də əldə etməlidirlər. Hər hansı bir yolla olur-olsun, ancaq həm savaş şəhvəti, həm də cinsi şəhvətin hər hansı bir döyüşən kişinin ruh-rəvanını dincəldib onu gücləndirdiyini deyirlər. Kişi olmadığıma görə yəqin ki, bu qonuda artıq söz-sovum ola bilməz. Ancaq oxuyub eşitdiklərim əsasda:

Cihadül-münakihə, ya nikah cihadı, birinci dəfə 2013-cü ildə Suriyanın iç savaşlarında Məhəmməd əl-Ərifi adlı vəhabi bir molla tərəfindən dini bir töhfə kimi fitva formasında "Nüsra cəbhəsi" savaşçılarının nəfinə Tvitterdə yazılmışdı. Hərçənd Məhəmməd əl-Ərifi bu tvitin onun tərəfindən yazılmasını dandığına rəğmən, Suriyada Bəşər Əsədin əleyhinə döyüşən savaşçıların içində rəsmi bir fitva kimi yayılmışdı. Elə bu fitvanın ardınca Tunis, Çeçenistan, Səudiyyə Ərəbistanı ölkələrindən nikah cihadına görə qadınlar Suriyadakı savaşçıların cəbhələrinə göndəriliblər.

Nikah cihadına gedib və bu cihaddan boylu qayıtmış 15 yaşlı Ayişə ölkəsi Səudiyyə Ərəbistanına dönüncə vəhabi müftiləri, Ayişəni nikah cihadının çempionu elan etdilər. Ayişə Suriyadan qayıdıb gələndən sonra demişdi: "Bəkarətimi İslam dininə təqdim eləyib və bətnimdə boylu qaldığım çocuq gələcəkdə İslam dininin adlı-sanlı cihadçılarından biri olacaq". Üstəlik, sonralar "Əlcəzirə" xəbər agentliyinin Qadətül-oveys adlı qadın xəbərçisinin Suriyada "nikah cihadı"na qatılması bir çox jurnal və xəbər agentliklərinin manşetinə çevrilmişdi.

"Nüsra cəbhəsi" savaşçılarının vəhabi müftiləri təkcə nikah cihadıyla kifayətlənməyib "nəfs nikah cihadı" və "livat cihadı"na da yol açıblar.

"Nəfs nikah cihadı" (cinsəl "oyuncaqlarla nəfsi sakitləşdirmə. – red.) əsasında, savaşçılar cinsi istəkləri sarıdan korluq çəkməsinlər deyə, kifayət qədər cihadçı qadın olmadığı halda Qərb ölkələrindən gələn eynicinslilərlə də əlaqədə olmaq imkanı veriblər.

"Livat cihadı"nın (eynicinslilərlə əlaqənin "şəriətən" qanuniləşdirilməsi. - red) təməli, birinci dəfə 2009-cu ildə, Səudiyyə Ərəbistanı şahzadəsi Məhəmməd bin-Nayifin terrorunda qoyuldu. Bu cihada görə, bir çox intihari əməliyatlarda (kamikadzelik. - red.) istişhadi şəxs (kamikadze. – red.) partlayış maddəsini öz məqədində (düz bağırsaq. - red.) daşımalıdır. Bu istıqamətdə partlayış maddəsinin çox həcmli olduğu üçün... Sözün və işin dalısını özünüz anlaya bilərsiniz!

Birinci dəfə Abdullah Həsən İsiri adlı bir şəxs partlayış maddəsini öz məqədində daşımışdı.

Vəhabi müftilərinin buyuruqlarına görə, nikah cihadı və bu kimi cihadlar, cənnətin yolunu cihadçı qadınlar üçün açır.

Artırmalıyam ki, "livat cihadı"nın doğru olub-olmadığını vurğulaya bilmədiyim halda ortaq xəbərləri müxtəlif saytlardan oxuduğumu diqqətinizə çatdırıram.

Xəbərləri oxuyub, çox pis hislər yaşasam da, hər nəyə rəğmən, İraq ölkəsində İŞİD terrorçuları sonuncu model silahlarını bədəvi xəncərləriylə barışdırıb, modern müsəlsəlləriylə günahsız insanları güllələyib, başlarını xəncərlə bədənlərindən ayırıb, İraq torpağının çox yerlərini insan qanına bələyiblər.

Burada ən çox diqqətimi çəkən mövzü bir anda və bir məkanda modernizmlə bədəviyyətin bir araya gəlib, barışması olub. Get-gedə qudrət şəhvəti İŞİD terrorçularının istər rəhbərliyində, istərsə də təkbətək savaşçılarında şiddətlənib, günahsız insanların ölümü onların şəhvətini soyutmayıb deyə, hicum üzrə birbəbir aldıqları şəhərlərdə nikah cihadı elan edirlər.

Mədəniyyət başlanğıcından bəri qadınların hər cürə qabalıq və zorakarlığa məruz qaldığı üçün tarixin səhifələrində az-çox söz getsə də, bu məsələ bütün mədəniyyətlərdə danılmaz bir məsələdir. Cinsi zorakarlığa məruz qalmış qadınlar tarix boyu tapdalanıb və hər zaman tarixin yazılmamış səhifələrində yer alıblar.

İŞİD terrorçularının nikah cihadı isə onların baş kəsmələrindən, son model avtomatik silahlarla insanları sıraya düzüb, cansız nişangahlar kimi onların başlarını nişan alıb, daş-torpağa güllə yağdıran kimi üstlərinə güllə yağdırıb, qan tökmələrindən heç də geri qalan deyil.

İŞİD terrorçuları bəlkə də Hitler kimi insanın soyunu nişan alıb, yeni bir soyqırımı salıb, nikah cihadı adıyla öz soylarını bütün dünyaya yaymaq istəyirlər.

"İraq Şam İslam" və Suriya dövlətinin daiyəsində olan terrorçular təkcə Şiə və yaxud İslam dininin ayrı-ayrı şöbələrinə cihad elan etməyib, bütün insanlıq əleyhinə savaş fərmanı veriblər. XXI yüzillikdə bu səviyyədə insan öldürüb, ərləri ölmüş qadınları və əqrəbaları qırılmış qızları cariyə-kölə kimi az bir müddət sürəsində nikahlarına salıb ya onları özlərinə halal bilməkləri əsrimizin bütün humanizm prinsiplərindən uzaqdır.

Məncə, hər zaman və hər yerdə bütün savaşlarda saysız-hesabsız insan ölsə də, ancaq savaşların şeytani üzü kişilərdən çox qadınları nişan alıb, savaşların can üzücü həqarəti yalnız və yalnız qadınların üzərinə ağnayır. İraq qadınlarını düşündüyümdə, özümü o qadınlarla özdəş sanıb, onların təhqir hislərinə qapılıb, bütün varlığımla tarixin tamam savaşlarına nifrət elan edirəm.

Sabir demişkən:

"Daş qəlbli insanları neylərdin, ilahi?!

Bizdə bu soyuq qanları neylərdin, ilahi?!

Artdıqca həyasızlıq olur el mütəhəmmil,

Hər zülmə dözən canları neylərdin, ilahi?

Hökm eyləyəcəkmiş bütün aləmdə cəhalət,

Deldadiyi-irfanları neylərdin, ilahi?!