Kult.az gənc şair Aynur Haqverdinin şeirlərini təqdim edir:

Çərçivədəki şəklimizin sən olan tərəfin

kəsib, təyyarə düzəldib

uçurmuşam lap uzaqlara.

Bəlkə də, bir sevinc payı göndərmişəm

Göydə təyyarə görəndə sevinən uşaqlara.

Dağları, çayları sülənib gəzən küləklərdən

Daha istəmirəm ətrini sənin.

Səni boğulmaqdan qurtaran köpəyintək

Daha istəmirəm xətrini sənin.

Məni sularına daş atdığım

Balıqların ahı tutdu.

Amma balıqlar atdığım daşları unutdu.

Daha darıxmıram, deyim biləsən.

Otağımın pəncərəsinə

Günəş şəkli çəkmişəm.

Gecələr qorxmayım deyə.

Şəkil deyirəm...

Şəklin...

Çərçivədə yerin bomboş qalıb.

Üstəlik məzartək qaralıb.

***

Gözlərimin buludlara dolmağı,

Yağışlara yağmağı öyrətdiyi

Günlərdə yazıram sənə.

Gözlərim çəkən yollarda

Səni gəzib azıram yenə.

Küləklərdən dilənirəm qoxunu.

Elə atmısan ki, zalım həsrətin oxunu

Gündüzlərimdən Günəşi,

Gecələrimdən Ayı

Parçalayıb töküb yerə.

Dualarım da çatmır ulu göylərə

Ki, görəydim səni barı bir kərə.

Xatirələr xatırlanıb şeir olur.

Gecələrim uzanıb ömür olur.

Darıxanların içdiyi su da zəhər olur.

Ağı deyir qəlb atışım,

Nakam ölən sevincimə, ümidimə.

Bu qos-qoca təkliyimi öldürtmək

İstəmirəm səndən özgə birinə.