Tatarıstanın paytaxtı Kazanda "Türkcənin Uluslararası Şeir Şöləni"nin 11-ci toplantısı keçirilir.

Axar.az-ın tədbirdə iştirakçı olan əməkdaşının verdiyi məlumata görə, oktyabrın 1-dən 4-ə qədər keçiriləcək Türkiyə Yazarlar Birliyi (TYB) tərəfindən düzənlənən "Türkcənin Uluslararası Şeir Şöləni"nin 11-cisinə TYB başqanı professor Hicabi Kırlanqıçın imzası ilə bütün türk dünyasından və dünyanın ayrı-ayrı ölkələrindən şairlər dəvət olunub. Azərbaycan şairləri Faiq Balabəyli və Əkbər Qoşalı da dəvət olunanlar arasındadır. Şairlərimiz sentyabrın 30-da Tatarıstanın paytaxtında olublar. Elə həmin gün Tatarıstanda fəaliyyət göstərən Azərbaycan diaspor üzvləri ilə şairlərimizin görüşü keçirilib. Görüşdə Azərbaycan ədəbiyyatının bu günü, ədəbi nümunələrimizin ölkəmizdən kənarda yayımlanması istiqamətində söhbətlər aparılıb.

Kazanda keçirilən 11-ci Uluslararası şeir şöləninin türk xalqlarının ədəbiyyatı, mədəniyyəti qarşısında böyük işlər görə biləcəyindən bəhs olunub. Şeir şöləninin rəsmi açılışı bu gün Tatarıstan Yazarlar Birliyinin və Tatarıstan Mədəniyyət Nazirliyinin iştirakı ilə olacaq.

Qeyd edək ki, tədbir ilk dəfə 1992-ci ildə Bursada, sonra Alma-Atı (Qazaxıstan), Aşqabad (Türkmənistan), Girnə (QKTC), Strasburq (Fransa), Ağməscid (Simferopol – Krım), Üsküp (Makedoniya), Bakı (Azərbaycan), Prizren (Kosova) və Bişkekdə (Qırğızıstan) gerçəkləşdirilib.