Azərbaycan Dillər Universiteti ilə (ADU) Cənubi Koreyanın nüfuzlu ali təhsil müəssisələrindən biri olan Sunqşil Universiteti arasında Anlaşma Memorandumu imzalanıb.

Axar.az xəbər verir ki, ADU-nun rektoru, akademik Kamal Abdulla tədbirdə çıxış edərək, son illər ADU ilə xarici ölkə universitetləri arasında elmi, mədəni əməkdaşlıq istiqamətində bir sıra tədbirlər həyata keçirildiyini bildirib.

“Bu gün əlamətdar bir gündür. ADU-da növbəti dil və mədəniyyət mərkəzi fəaliyyətə başladı. Mərkəzin fəaliyyətə başlaması ilə qardaş Özbəkistan xalqının dili, mədəniyyəti, tarixi və ədəbiyyatının öyrənilməsi, tədqiq olunması istiqamətində mühüm işlərə imza atılacaq. Bu ADU-nun növbəti uğurudur.

Həmçinin bu gün biz Cənubi Koreyanın Sunqşil Universiteti ilə əməkdaşlıq haqqında müqaviləni imzalayacağıq. Bu müqavilənin hər iki ölkənin elmi, mədəni münasibətlərinin inkişafına töhfə verəcəyinə inanırıq. Koreya dilinin tədrisi və öyrənilməsi ilə bağlı ADU-da fəaliyyət göstərən Koreya dili və mədəniyyəti mərkəzi öz üzərinə düşən işin öhdəsindən layiqincə gəlir. Tələbələrimiz Koreya dilinə, mədəniyyətinə, tarixinə və ədəbiyyatına böyük maraq göstərirlər. Bu da sevindirici haldır.

İnanıram ki, Koreyada fəaliyyət göstərən universitetlərdən birində də Azərbaycan dili və mədəniyyəti mərkəzinin faəliyyəti ilə bağlı qərar qəbul ediləcəkdir. Bu qarşılıqlı elmi və mədəni əməkdaşlıq baxımından mühüm əhəmiyyət kəsb edir. Bu əlaqələr bizə müəllim-tələbə mübadiləsi, elmi konfranslar və təcrübə imkanlarının dəyərləndirilməsi üçün zəruridir”, - akademik qeyd edib.

Daha sonra çıxış edən Koreya Tədqiqatlar İnstitutunun direktoru Ça Bong Jun Azərbaycan Dillər Universitetində olmaqdan məmnunluğunu ifadə edərək, ADU-nun beynəlxalq əlaqələrə verdiyi önəmi yüksək qiymətləndirib. İmzalanan Memorandumun iki ölkə arasında akademik körpünün möhkəmlənməsinə xidmət edəcəyini və bu əməkdaşlığın uzunmüddətli perspektivdə uğurlu nəticələr verəcəyi qeyd olunub.

Çıxışlardan sonra tərəflər arasında Anlaşma Memorandumu imzalanıb. Tədbirin sonunda qarşılıqlı əməkdaşlıq imkanları, gələcək birgə fəaliyyət istiqamətləri və konkret addımlar ətrafında geniş müzakirələr aparılıb.