İsrail Baş naziri Benyamin Netanyahunun “Xamenei artıq yoxdur” açıqlamasından sonra “Röyters” İsrail rəsmilərinə istinadən, dini liderin cəsədinin tapıldığını yazır. “Axios” nəşri isə İsrail səfirinin amerikalı rəsmiləri bununla bağlı məlumatlandırdığını bildirir.

Dini liderin zərbə endirilən qərargahının görüntüləri oradan sağ çıxmağın mümkün olmadığını deməyə əsas verir, hərçənd, onun orada olub-olmadığı məlum deyil. Müəyyən detallar isə Xameneinin öldüyünə dair ehtimalları gücləndirir:

- Oğlu Müctəba (Xameneidən sonra dini liderliyə potensial namizədlər arasında idi), gəlini və kürəkəninin öldürüldüyü məlumatı yayılıb: mümkündür ki, dini lider də daxil olmaqla, onlar vurulan qərargahda olublar;

- Xarici işlər naziri Abbas Arakçının Xamenei və digər liderlərin sağ olub-olmadığı haqda suala “bildiyim qədər sağdırlar” cavabı şübhələri artırıb;

- Hücumların başlanmasından az sonra dini liderin xalqa müraciət edəcəyi deyilsə də, heç bir müraciət edilməyib;

Xamenei ölsə də, bunun İran tərəfindən qısa müddətdə təsdiq ediləcəyi ehtimalı azdır. Çünki dini liderin yoxluğu həm rejim daxilində parçalanmaya yol aça, həm də cavab əməliyyatlarını və dirənişi sual altına sala bilər. Hətta rejim dirənə bilsə belə, Xamenei ilə bağlı nə baş verdiyini sona qədər gizlətməyə çalışacaqlar.