İyunun 20-də Milli Məclisin İnsan hüquqları, hüquq siyasəti və dövlət quruculuğu komitələrinin birgə iclasında sənədin müzakirəsi zamanı dediyim fikirlər və bununla əlaqədar mətbuata açıqlamam tamamilə kontekstdən çıxarılıb.

Bunu Axar.az-a açıqlamasında Milli Məclisin intizam komissiyasının sədri Ağacan Abıyev deyib.

Millət vəkili bildirib ki, “Milli Məclis deputatının etik davranış qaydaları haqqında” qanun layihəsi ilə bağlı söylədiyi fikirlər ictimaiyyətə tamamilə yanlış təqdim olunub.

“Bu qanun dünyanın əksər ölkələrində qəbul olunub. Çox da uğurla işləyir. Mən qanunun əhəmiyyətini yüksək qiymətləndirirəm. Heç kəs bu sənədin aktuallığını şübhə altına ala bilməz. Əsla, qanun layihəsinin mahiyyətini azaldacaq bir fikrə yol verməmişəm. Sadəcə qanun layihəsində deputata verilən hədiyyələr məsələsinə münasibət bildirmişəm. Xahiş edirəm, mənim fikirlərim cəmiyyətə yanlış şəkildə təqdim olunmasın”, - Abıyev bildirib.

Qeyd edək ki, bəzi mətbuat orqanları “Milli Məclis deputatının etik davranış qaydaları haqqında” qanun layihəsini Ağacan Abıyevın “mənasız və qeyri-ciddi” adlandırması barədə yanlış xəbər yayıb.